अविनाश भोसले यांची जप्त मालमत्ता परत करा

अविनाश भोसले यांची जप्त मालमत्ता परत करा
ईडीची सरकारला विनंती

मुंबई, ता. ३० ः आर्थिक गैरव्यवहार प्रकरणातून विशेष न्यायालयाने दोषमुक्त केल्यानंतर सक्तवसुली संचालनालयाने (ईडी) पुण्याचे बांधकाम व्यावसायिक आणि कंत्राटदार अविनाश भोसले आणि एआरए प्रॉपर्टीज या कंपनीच्या मालमत्तांवरील जप्ती हटविण्याची विनंती सरकारला केली आहे. ईडीने तसे पत्र १२ जून रोजी पुणे येथील नोंदणी महानिरीक्षक आणि मुद्रांक नियंत्रक कार्यालयाला लिहिले आहे.
पुण्याच्या चतुःश्रृंगी पोलिस ठाण्यात भोसले आणि एआरए प्रॉपर्टीजविरोधात भूखंड बळकावण्याच्या कथित आरोपात गुन्हा दाखल झाला होता. या प्रकरणात कोट्यवधी रुपयांचा आर्थिक गैरव्यवहार घडल्याच्या संशयावरून ईडीने समांतर तपास करीत भोसले आणि संबंधित कंपनीच्या मालमत्तांवर तांत्रिक जप्ती आणली होती. जप्त केलेल्या मालमत्तांमध्ये पुण्याच्या गणेश खिंड मार्गावरील यशवंत घाडगे नगर सहकारी गृहनिर्माण संस्थेचा समावेश आहे. दरम्यान, डिसेंबर २०२२ आणि एप्रिल २०२३मध्ये विशेष पीएमएलए न्यायालयाने भोसले यांच्यासह सर्व आरोपींची निर्दोष सुटका केली होती. त्यानंतर लवादानेही जप्तीची कारवाई रद्द केली. त्या पार्श्वभूमीवर ईडीने जप्ती हटवून त्या मालमत्ता परत कराव्या, अशी विनंती नोंदणी महानिरीक्षक आणि मुद्रांक नियंत्रक कार्यालयाला केली आहे.