खड्ड्याचा दंड कमी करण्याचा प्रयत्न

खड्ड्याचा दंड कमी करण्याचा प्रयत्न
मंत्री मंगलप्रभात लोढा यांचे आश्वासन
सकाळ वृत्तसेवा
मुंबई, ता. ३० : गणेशोत्सव मंडळांनी मंडपासाठी रस्त्यावर खड्डे खोदल्यास त्यांना होणारा १५ हजारांचा दंड कमी करण्यासाठी आपण प्रयत्न करू, असे आश्वासन कॅबिनेट मंत्री प्रभात लोढा यांनी दिले.
मुंबई महापालिकेच्या सी प्रभाग कार्यालयात बुधवारी (ता. ३०) लोढा यांच्या प्रमुख उपस्थितीत जनता दरबार घेण्यात आला. या वेळी दाखल झालेल्या एकूण ३१८ तक्रारींचे तत्काळ निराकरण करण्यात आले. लोढा यांचा हा पाचवा जनता दरबार होता. दरम्यान, नव्या नियमावलीनुसार गणेशोत्सव मंडळांनी मंडपासाठी खड्डे खणल्यास मुंबई महापालिकेने १५ हजार रुपये दंड आकारण्याचा निर्णय घेतला होता. याबाबत असलेल्या नाराजीची मंत्री लोढा यांनी दखल घेतली. मुंबई महापालिकेद्वारे लावलेल्या दंडाबाबत गणेश मंडळांच्या भावना आम्ही जाणतो. त्याबाबत लवकरच आयुक्तांची भेट घेऊन योग्य तोडगा काढण्यात येईल, असे आश्वासन लोढा यांनी दिले. त्याचप्रमाणे सी प्रभागातील खड्डे भरण्याचे काम दहा दिवसांत पूर्ण करावे, असे निर्देशही लोढा यांनी अधिकाऱ्यांना दिले.