कबुतरांना खाद्य घालणाऱ्यांविरुद्ध तक्रार नोंदवा!

कबुतरांना खाद्य घालणाऱ्यांविरुद्ध तक्रार नोंदवा!
उच्च न्यायालयाचे मुंबई महापालिकेला आदेश
सकाळ वृत्तसेवा
मुंबई, ता. ३० ः मुंबईतील कबुतरांना खाद्य घालण्याबाबत कोणताही दिलासा देण्यास उच्च न्यायालयाने बुधवारी (ता. ३०) नकार दिला. तसेच या आदेशानंतरही कबुतरांना खाद्य घालण्यात येत असेल आणि याबाबत महापालिकेच्या कर्मचाऱ्यांना कर्तव्य बजावण्यात अडथळा आणला जात असेल, तर अशा व्यक्तींविरोधात तक्रार नोंदवा, असे आदेशही न्यायालयाने पालिकेला दिले.
न्यायालयीन आदेशाचा चुकीचा अर्थ काढू नये, माणसांच्या आरोग्यापेक्षा महत्त्वाचे काहीही असू शकत नाही, असे निरीक्षण न्या. गिरीश कुलकर्णी आणि न्या. आरिफ डॉक्टर यांच्या खंडपीठाने नोंदवले. त्याच वेळी मुंबईतील कबुतरखान्यांवर पाडकाम कारवाई करण्यापासून मज्जाव करण्याचे दिलेले आदेशही न्यायालयाने कायम ठेवले. मुंबईतील कबुतरखान्यांमुळे नागरिकांचे आरोग्य धोक्यात आल्याने मुंबई महापालिकेने कबुतरखाने बंद करण्यासाठी तत्काळ मोहीम राबवावी, असे आदेश सरकारने महापालिकेला दिले होते. त्यानंतर महापालिकेने दादरच्या कबुतरखान्यावर कारवाई करून अनधिकृत बांधकाम हटवले आणि कबुतरांचे खाद्य जप्त केले. मुंबईतील अन्य कबुतरखान्यांवरही महापालिकेने कारवाई सुरू केली होती. त्याविरोधात पल्लवी पाटील, स्नेहा विसरारिया आणि सविता महाजन यांनी न्यायालयात धाव घेतली होती.