धारावीतील सर्वेक्षण १२ ऑगस्टपासून बंद

धारावीतील सर्वेक्षण १२ ऑगस्टपासून बंद
झोपडीधारकांना हेल्पलाइनवर संपर्क साधल्यानंतरच तपशील नोंदवण्याची संधी
सकाळ वृत्तसेवा
मुंबई, ता. ३१ : धारावी पुनर्विकास प्रकल्पांतर्गत सुरू असलेले धारावीतील घरोघरी जाऊन केले जाणारे सर्वेक्षण १२ ऑगस्टपासून बंद होणार आहे. सध्या ८७ हजारांहून अधिक झोपड्यांचे सर्वेक्षण पूर्ण झाले असून, एक लाखांहून अधिक झोपड्यांना विशिष्ट नंबर दिले आहेत. तसेच उर्वरित झोपड्यांचे सर्वेक्षण १२ ऑगस्टपर्यंत केले जाणार आहे. त्यानंतर सर्वेक्षण करणाऱ्या पथकांचे दौरे थांबवले जातील. दरम्यान, जे रहिवासी आवश्यक कागदपत्रांसह डीआरपी हेल्पलाइनवर संपर्क साधून डीआरपी किंवा एनएमडीपीएल कार्यालयात भेट देतील, त्यांना सर्वेक्षण प्रक्रियेत सामील होण्याची संधी दिली जाणार आहे.
धारावीत सुमारे १.२० लाख झोपड्या नकाशावर दर्शविण्यात आल्या आहेत. त्यांचे धारावी, कुर्ला, मुलुंड, कांजूरमार्ग, भांडुप आणि मुक्तेश्वर आदी ठिकाणी पुनर्वसन केले जाईल, असे धारावी पुनर्विकास प्रकल्पाच्या (डीआरपी) अधिकाऱ्यांनी स्पष्ट केले आहे. ज्या भागात सर्वेक्षण करणाऱ्या पथकांनी यापूर्वीच भेट दिली आहे, अशा भागात १२ ऑगस्टनंतर घरोघरी सर्वेक्षण होणार नाही. जे रहिवासी या कालावधीत सर्वेक्षणात सहभागी झाले नाहीत, त्यांनी स्वेच्छेने शासन योजनेतून बाहेर राहण्याचा निर्णय घेतल्याचे गृहीत धरले जाईल; मात्र रहिवासी मसुदा परिशिष्ट-२ जाहीर झाल्यानंतर संबंधित रहिवासी आपली हरकत नोंदवू शकतील, असेही अधिकाऱ्यांनी सांगितले. तसेच घरोघर सर्वेक्षण अंतिम आले असल्याचे आम्ही अनेकदा स्पष्ट केले आहे. त्यामुळे ज्यांनी अद्याप सहभागी होणे टाळले आहे, त्यांनी तातडीने आपली माहिती नोंदवावी, असे आवाहनही डीआरपीने केले आहे.

खासगी जमिनीवरील झोपड्यांच्या सर्वेक्षणात अडथळे
डीआरपीच्या सर्वेक्षणाने जवळपास पूर्ण धारावीत सर्वेक्षण प्रक्रिया पूर्ण केली आहे. केवळ काही खासगी मालकीच्या जमिनी, कुंभारवाडा आणि कंपाउंड १३ यांसारख्या ठिकाणी असलेल्या झोपड्यांच्या सर्वेक्षणात अद्याप काहीसे अडथळे आहेत; मात्र जे रहिवासी वैध कागदपत्रांसह हेल्पलाइनवर संपर्क साधतील, त्यांचा तपशील तत्काळ सर्वेक्षण यादीत समाविष्ट केला जाणार आहे.