मुंबईत ७ महिन्यात ३२ अवयवदान

मुंबईत सात महिन्यांत ३२ अवयवदान
सकाळ वृत्तसेवा
मुंबई, ता. ३१ : मुंबईत या वर्षाच्या पहिल्या सात महिन्यांत मृत्यूनंतर केलेल्या अवयवदानाची संख्या ३२ वर पोहोचली आहे, जी शहरात अवयवदानाबद्दल जागरूकता आणि सहकार्याची सकारात्मक दिशा दर्शवते.
२९ जुलै रोजी, मुंबईतील सर एचएन रिलायन्स रुग्णालयात ५७ वर्षीय पुरुष रुग्णाचे हृदय, यकृत, दोन्ही मूत्रपिंडे, तसेच कॉर्निया आणि त्वचा यांचे मृत्यूनंतर यशस्वीरित्या दान करण्यात आले. हे दान झेडटीसीसी (झोन ट्रान्सप्लांट कोऑर्डिनेशन सेंटर), मुंबई यांच्या मार्गदर्शनाखाली करण्यात आले आणि राज्य सरकारच्या नियमांनुसार अवयवांचे वाटप करण्यात आले.
अवयवदान केलेल्या रुग्णाचे नातेवाईक स्वत सामाजिक कार्यात कार्यरत असल्याने त्यांना अवयवदानाबाबत माहत होते. माहिती देताना झेडटीसीसी समन्वयक उर्मिला महाजन यांनी या योगदानाबद्दल कुटुंबाचे आभार मानले आणि सांगितले की, हे उदाहरण इतरांनाही प्रेरणा देईल.

मुंबईत अवयवदानाला चालना
मुंबईत अवयवदान चळवळीला चालना मिळाली आहे. सात महिन्यांत ३२ अवयवदान झाले आहे. ३२व्या अवयवदानात चार जणांना जीवदान, दोघांना दृष्टी मिळाली आहे. गेल्या संपूर्ण वर्षात ५० अवयवदान झाले होते; मात्र यावर्षी पहिल्या सात महिन्यांत ३२ अवयवदान झाल्याने ही बाब महत्त्वाची मानली जात आहे.