नियमभंग करणाऱ्यांवर पालिकेचा बुलडोझर

नियमभंग करणाऱ्यांवर
पालिकेचा बुलडोझर
कमला मिल परिसरात कारवाई; देविका फूडवर जप्ती

सकाळ वृत्तसेवा
मुंबई, ३१ : मुंबईच्या कमला मिल परिसरात नियमभंग करणाऱ्या आस्थापनांवर महापालिकेच्या जी/दक्षिण विभागाने आज धडक कारवाई करून जप्ती व तोडक मोहीम राबवली. अग्निसुरक्षा, सार्वजनिक आरोग्य आणि इमारत नियमांचे सर्रास उल्लंघन करणाऱ्या आस्थापनांची एकाच दिवशी पाहणी करून दोन हॉटेलवर जप्ती, तर अनेक ठिकाणी बेकायदा निवारे आणि कुंपण भिंत जमीनदोस्त केली.

जी/दक्षिण विभागाच्या फायर कम्प्लायन्स सेलमार्फत आज कमला मिल्स परिसरात संयुक्त पाहणी आणि अंमलबजावणी कारवाई करण्यात आली. या कारवाईत अग्निशमन विभाग, इमारत व कारखाना विभाग, वैद्यकीय आरोग्य अधिकारी विभाग, अतिक्रमण हटाव विभाग आणि देखभाल विभाग यांनी सहभाग घेतला.

अतिरिक्त महापालिका आयुक्त (शहर) अश्विनी जोशी, उपायुक्त झोन दोन प्रशांत सपकाळे आणि सहाय्यक आयुक्त जी/दक्षिण स्वप्नजा क्षीरसागर यांच्या मार्गदर्शनाखाली ही कारवाई करण्यात आली.
--------------
या ठिकाणी पाहणी
पालिका पथकाने केलेल्या पाहणीदरम्यान थिओब्रोमा रेस्टॉरंट, मॅकडोनाल्ड्स, शिवसागर हॉटेल, नॅनो’स कॅफे, स्टारबक्स, बीरा टॅप्रूम, फूड बाय देविका इत्यादी आस्थापनांची तपासणी करण्यात आली. यात अटींचा भंग आणि खुल्या जागेचा बेकायदा वापर केल्याप्रकरणी आरोग्य विभागाने टॅप्रूम आणि फूड बाय देविका या दोन आस्थापनांवर जप्तीची कारवाई केली.
........