वाहतूक विभागाकडे अपघातांचा लेखा-जोगा नाही

वाहतूक विभागाकडे अपघातांचा लेखाजोखा नाही
माहिती अधिकारातून बाब उघड; पश्चिम विभागातील प्रकार
सकाळ वृत्तसेवा 
मुंबई, ता. ३१ : वाहतूक पोलिसांच्या पश्चिम विभागात झालेल्या  अपघातांची माहिती विभागाकडे उपलब्ध नसल्याचे  माहिती अधिकारातून समोर आले आहे. 
मुंबई वाहतूक पोलिसांचे  सात विभाग आहेत. त्यांना आपले कार्यक्षेत्र ठरवून दिलेले आहे. त्या त्या विभागात आपल्या भागातील माहिती असते. त्या माहितीचा उपयोग पुढे नियोजन करण्यासाठी किंवा  चुका टाळण्याठी वापर करता येतो. सामाजिक कार्यकर्ते निकोलस अलमेडा माहिती अधिकारातून याबाबतची मागितली होती. दरम्यान, ही माहितीच  उपलब्ध नाही, असे उत्तर पश्चिम विभागाकडून देण्यात आले आहे.  
अलमेडा यांनी सहार वाहतूक विभागाने अंधेरी-कुर्ला रोड येथील (मथुरादास वासनजी मार्ग) ट्रेड स्टार बिल्डिंगजवळ, जे. बी. मेट्रो स्थानकाजवळ अंधेरी (पूर्व)  येथे बेकायदा पार्किंग केलेल्या वाहनांची माहिती द्यावी, सहार वाहतूक विभागाच्या हद्दीतील सहार विमानतळ रस्त्यावर वाहनांमुळे झालेल्या अपघाती मृत्यूंची माहिती द्यावी, १ जानेवारी २०२० ते ९ जुलै २०२५ या कालावधीतील माहिती असावी, असे त्यांनी म्हटले होते; मात्र माहिती उपलब्ध नसल्याचे वाहतूक पोलिसांनी म्हटले आहे. 

बेकायदा पार्किंग केलेल्या वाहनांची माहिती, सहार विमानतळ रस्त्यावर वाहनांमुळे झालेल्या अपघाती मृत्यूंची माहिती उपलब्ध नाही.
- योगेश तांदळे, प्रभारी पोलिस निरीक्षक, सहार वाहतूक विभाग