एटीएस, एनआयएच्या कार्यक्षमतेवर सवाल

एटीएस, एनआयएच्या कार्यक्षमतेवर सवाल

पुरावे गोळा करण्याचा प्रवास खडतर : पोलिसांचा दावा

मुंबई : ७/११ आणि मालेगाव खटल्याच्या निकालाने एटीएससह एनआयए या प्रमुख तपास यंत्रणांच्या कार्यक्षमतेवर प्रश्नचिन्ह निर्माण झाले आहे. दुसरीकडे अशा गुन्ह्यांत आरोपींची ओळख पटवण्यापासून त्यांच्याविरोधातील पुरावे गोळा करण्याचा प्रवास अत्यंत खडतर असल्याचा दावा संबंधित आजी-माजी पोलिस अधिकारी करीत आहेत.

दहशतवादी कृती मनात आली आणि केली असे होत नाही. त्याचा कट आधीपासून शिजत असतो. प्रत्येक कृतीबाबत विचार केला जातो. विशेष म्हणजे तपास यंत्रणा आपल्यापर्यंत पोहोचू नयेत, पोहोचल्या तरी चौकशी आणि खटल्याच्या टप्प्यावर बचावासाठीचा आरोपींचा कृती आराखडा आधीपासूनच तयार असतो, अशी प्रतिक्रिया एका निवृत्त आयपीएस अधिकाऱ्याने दिली.

या प्रकरणात आरोपी एकमेकांच्या परिचित होते. त्यांनी महाराष्ट्रासह अन्य राज्यांमध्ये बैठका घेतल्या. तेथेच स्फोटाचा कट आखला हे तपास पातळीवर स्पष्ट करणाऱ्या प्रमुख साक्षीदारांनीच न्यायालयात साक्ष फिरवली. बनावट आरोपी पकडून त्यांना शिक्षा देण्याचा तपास यंत्रणेचा हेतू असता तर साक्षीदारांना साक्ष फिरवण्याचे स्वातंत्र्य मिळाले असते का, असा प्रश्‍न अन्य अधिकाऱ्याने उपस्थित केला.

स्फोट स्थळावरून हस्तगत दुचाकीवरून आरोपींपर्यंतचे धागेदोरे तपास यंत्रणेच्या हाती लागले. या दुचाकीवर बनावट नंबर प्लेट होती. चेसिस क्रमांक मिटवण्याचा प्रयत्न झाला होता; मात्र तज्ज्ञांकडून खरा नंबर मिळवण्यात यश आले आणि आरोपींची ओळख पटू लागली. त्याच व्यक्ती बहुतांश बैठकांत हजर होत्या. या कटाचे परिस्थितीजन्य पुरावे सापडले. ठोस पुरावे हाती लागले नाहीत, अशी प्रतिक्रिया एका अधिकाऱ्याने नोंदवली.
------------
उच्चाधिकार समिती नेमावी!
दोन्ही निकालांचे विश्लेषण उच्चाधिकार समितीकडून व्हावे. कोण कुठे चुकले हे या समितीने शोधून काढावे आणि त्यानुसार संबंधित विभागाने दोषींवर कारवाई करावी. जर निष्पाप व्यक्तींना गोवल्याचे स्पष्ट झाले तर संबंधित पोलिस पथकावर कायदेशीर कारवाई करावी, त्यांच्याविरोधात खटला चालवावा; जेणेकरून भविष्यात असे प्रकार घडणार नाहीत, असे माजी पोलिस अधिकारी वाय. पी. सिंग यांनी सांगितले.