एफडीएचे ऑनलाइन पोर्टल आणखी दोन दिवस बंद

एफडीएचे ऑनलाइन पोर्टल आणखी दोन दिवस बंद
सकाळ वृत्तसेवा
मुंबई, ता. १ : राज्यातील अन्न औषध प्रशासनाचे (एफडीए) ऑनलाइन ॲप्लिकेशन पोर्टल गेल्या दोन दिवसांपासून बंद असून, ते आणखी दोन दिवस बंद राहणार आहे. त्यामुळे राज्यभरातील सुमारे ९१ हजार औषध उत्पादक, घाऊक विक्रेते आणि केमिस्ट अडचणीत वाढ झाली आहे. यामध्ये मुंबईतील सुमारे १८ हजार घाऊक आणि किरकोळ विक्रेत्यांचाही समावेश आहे.
एफडीएकडून औषध परवाने, परवाना नूतनीकरण तसेच नवीन औषध उत्पादक परवाने यासाठी पारदर्शक पद्धतीने अर्ज प्रक्रियेसाठी हे पोर्टल सुरू करण्यात आले होते; मात्र पोर्टल बंद असल्याने संबंधित व्यवहार ठप्प झाल्याचा आरोप औषध पुरवठादार करत आहेत. मुंबईसह संपूर्ण राज्यातील केमिस्ट, घाऊक विक्रेते आणि औषध उत्पादक कंपन्यांना याचा थेट फटका बसत आहे, अशी माहिती ऑल इंडिया फूड अँड ड्रग लायसन्स होल्डर्स फाउंडेशनचे अध्यक्ष अभय पांडे यांनी दिली.
गेल्या दोन दिवसांपासून डेटा मायग्रेशन आणि बॅकअपचं काम सुरू असून, यासाठीच पोर्टल बंद ठेवण्यात आले आहे. हे काम पूर्ण होण्यासाठी आणखी दोन दिवस लागणार आहेत. त्यानंतर पोर्टल सुरू करण्यात येईल, असे एफडीए आयुक्त राजेश नार्वेकर यांनी सांगितले.