राज्याच्या तिजोरीत जुलैमध्ये १,१०१ कोटींची भर

राज्याच्या तिजोरीत जुलैमध्ये १,१०१ कोटींची भर
मुंबईत एका महिन्यात १२,३६६ मालमत्तांची नोंदणी
सकाळ वृत्तसेवा
मुंबई, ता. १ : मुंबई शहरातील मालमत्ता नोंदणीच्या माध्यमातून जुलै महिन्यात राज्य सरकारच्या तिजोरीत तब्बल १,१०१ कोटी रुपयांची भर पडली आहे. एका महिन्यात जवळपास १२ हजार ३६६ मालमत्तांची नोंदणी झाली असून, गेल्या तीन महिन्यांतील सर्वाधिक आहे, असे नाइट फ्रॅंक या संस्थेच्या अहवालातून समोर आले आहे.
मे आणि जून महिन्यात प्रत्येकी साडेअकरा हजार मालमत्तांची नोंदणी झाली होती, तर त्या माध्यमातून प्रत्येकी १,०५० कोटी रुपयांचा महसूल जमा झाला होता. दरम्यान, जानेवारी ते जुलै या सात महिन्यांत एकूण ८८ हजार ४२६ मालमत्तांची नोंदणी झाली आहे.
मुंबई शहर आणि उपनगरात मार्चमध्ये १५ हजार ५००, तर एप्रिलमध्ये १३ हजारांहून अधिक मालमत्तांची नोंदणी झाली होती. त्यानंतर मे आणि जून महिन्यात रिअल इस्टेटमध्ये काहीशी नकारात्मकता आल्याने मालमत्तांची नोंदणी कमी होऊन साडेअकरा हजारांपर्यंत खाली आली होती. त्यामुळे महसुलात घट नोंदली होती; मात्र जुलैमध्ये रिअल इस्टेटमध्ये तेजी दिसत आहे. त्याचा मालमत्ता नोंदणी आणि त्या माध्यमातून मिळणाऱ्या महसुलात मागील वर्षीच्या जुलै महिन्यातील महसुलाचा विचार करता वाढ झाल्याचे नाइट फ्रॅंक या संस्थेच्या अहवालावरून स्पष्ट होत आहे.

मध्यम किमतीच्या घरांच्या मागणीत घट
सध्याचे रिअल इस्टेट मार्केट पाहता निवासी मालमत्तांना मोठी मागणी असून, जुलैमध्ये नोंदणी झालेल्या मालमत्ताचा विचार करता ८० टक्के नोंदणी निवासी मालमत्तांची नोंदणी आहे. जुलै महिन्यातील नोंदणीवरून मध्यम किमतीच्या घरांच्या मागणीत काहीशी घट झाली असली तरी महागड्या घरांची नोंदणी जास्त झाली आहे. त्यामुळे बाजारात स्थिरता आल्याचे मत नाइट फ्रॅंक इंडियाचे अध्यक्ष शिशिर बैजल यांनी व्यक्त केले.