मुंबईकरांवर पावसाळी आजारांचे सावट

मुंबईकरांवर पावसाळी आजारांचे सावट
जुलैमध्ये मलेरिया, डेंगी आणि हिपॅटायटीसच्या रुग्णांमध्येही वाढ
सकाळ वृत्तसेवा
मुंबई, ता. १ ः मुंबईत पावसाळी आजारांचे सावट वाढले आहे. पालिका आरोग्य विभागाकडून मिळालेल्या आकडेवारीनुसार, जुलैमध्ये मलेरियाचे सर्वाधिक १,२९४ रुग्ण आढळले, तर डेंगीचे ७०५, हिपॅटायटीस १७६ आणि लेप्टोचे ११४ रुग्ण आढळले. पावसाळी आजारांचा वाढता प्रादुर्भाव पाहता, डॉक्टरांनी लोकांना त्यांच्या आरोग्याबाबत सावधगिरी बाळगण्यास आणि आजारांपासून बचाव करण्यासाठी सतर्क राहण्यास सांगितले आहे.
या वेळी मुंबईत डासांमुळे होणाऱ्या आजारांचा प्रादुर्भाव दर महिन्याला वाढत असल्याचे दिसून येते. पालिकेच्या आकडेवारीनुसार, जूनमध्ये मलेरियाचे ८८४ रुग्ण आढळले होते; परंतु जुलैमध्ये १,२९४ नवीन रुग्ण आढळले, तर जूनमध्ये एकूण १०८ जणांना डेंगीची लागण झाली होती; परंतु जुलैमध्ये ७०५ जणांना संसर्ग झाला आहे. तर, जूनमध्ये हिपॅटायटीस ए आणि ई चे ७८ रुग्ण आढळले होते, जे दूषित पाणी पिण्यामुळे होते, तर जुलैमध्ये बाधितांची संख्या १७६ वर पोहोचली आहे.
वरील आकडेवारीवरून असे दिसून येते, की जूनच्या तुलनेत जुलैमध्ये मलेरियाच्या रुग्णांमध्ये ४६ टक्क्यांनी वाढ झाली आहे, तर डेंगीच्या रुग्णांमध्ये पाच पटीने जास्त वाढ झाली आहे. हिपॅटायटीसच्या रुग्णांमध्येही सुमारे १२५ टक्क्यांनी वाढ झाली आहे.
ब्रीच कँडी रुग्णालयाचे इंटरनल मेडिसिन स्पेशालिस्ट डॉ. प्रीत समदानी म्हणाले, की येथे मलेरिया आणि डेंगी दोन्हींचे रुग्ण येत आहेत; परंतु मलेरियाचे रुग्ण जास्त आहेत. मलेरियामध्येही दोन्ही प्रकारचे, फाल्सीपेरम आणि व्हायवॅक्सचे रुग्ण आढळत आहेत. सुमारे २० ते २५ टक्के रुग्णांना दाखल करण्याची आवश्यकता आहे.
इंटेन्सिव्हिस्ट आणि फिजिशियन डॉ. अमित खोमणे म्हणाले, की या वेळी मलेरियाच्या रुग्णांमध्ये लक्षणीय वाढ दिसून येत आहे. आमच्या एकूण रुग्णांपैकी १० टक्के रुग्णांना दाखल करण्याची आवश्यकता आहे, ज्यामध्ये वृद्ध, मलेरियासह इतर आजारांनी ग्रस्त असलेले लोक आणि गंभीर स्थितीत असलेले लोक यांचा समावेश आहे, जरी रुग्ण पाच ते सात दिवसांत बरे होतात.
डॉ. प्रीत समदानी म्हणाले, की माझ्याकडे दोन रुग्ण आहेत; ज्यांना दुहेरी संसर्गाची पुष्टी झाली आहे. म्हणजेच, त्यांना डेंगी आणि मलेरिया दोन्ही संसर्ग झाला.

कमी प्लेटलेट्स आणि मल्टी-ऑर्गन फेल्युअर
पालिकेच्या एका वरिष्ठ डॉक्टरने नाव न सांगण्याच्या अटीवर सांगितले, की आम्हाला डेंगी आणि मलेरिया दोन्हींचे रुग्ण आढळत आहेत. बरेच रुग्णदेखील दाखल केले जात आहेत. विशेषतः कमी प्लेटलेट्स असलेले किंवा मल्टी-ऑर्गन फेल्युअर असलेले. चांगली गोष्ट म्हणजे जे रुग्ण गंभीर नाहीत, त्यांना तीन दिवसांत डिस्चार्ज दिला जातो; पण जे रुग्ण गंभीर आहेत, त्यांना बरे होण्यासाठी सात ते १० दिवस लागतात.

मलेरियाची लक्षणे :
उच्च ताप, थंडी वाजून येणे आणि थरथरणे, घाम येणे, डोकेदुखी, मळमळ आणि उलट्या, स्नायू आणि सांधेदुखी, थकवा आणि अशक्तपणा, अतिसार

डेंगीची लक्षणे :
उच्च ताप, डोकेदुखी, डोळ्यांच्या मागे वेदना, स्नायू, सांधे आणि हाडांमध्ये तीव्र वेदना, थकवा आणि अशक्तपणा, उलट्या, त्वचेवर पुरळ, नाक, हिरड्या किंवा शरीराच्या कोणत्याही भागातून रक्त येणे, पोटदुखी किंवा सूज येणे.