टिळक उड्डाणपुलावर अवजड वाहनांना बंदी

टिळक उड्डाणपुलावर अवजड वाहनांना बंदी
बी. ए. रोडवरील वाहनांची संख्या वाढणार
सकाळ वृत्तसेवा
मुंबई, ता. २ : दादर येथील टिळक उड्डाणपुलावरील वाहतूक कोंडी व आपत्‍कालीन वाहनांना प्रवेश करण्यास येणाऱ्या अडचणींवर उपाय म्हणून २ ते ३० ऑगस्टदरम्‍यान अवजड वाहनांना प्रवेश बंदी असणार आहे. त्यामुळे बी. ए. रोडवरील वाहनांची संख्या वाढणार आहे. टिळक पुलावरून दररोज ८० हजार ते एक लाख वाहनांची ये-जा होते.
दादर पश्चिम आणि पूर्वेला जोडणाऱ्या सर्वात जुन्या टिळक पुलाची आता दुरवस्था झाली असून, या पुलाच्या दुरुस्तीची कामे हाती घेण्यात आली आहेत. भविष्यात या पुलाला पर्यायी पूल बांधण्याचे पालिकेचे प्रयत्न सुरू आहेत. या मार्गावर वाहतुकीचे नियमन व नियंत्रण करणे सोयीचे व्हावे, यासाठी टिळक उड्डाणपुलावर अवजड वाहनांना पूर्णतः बंदी करण्यात येणार आहे.
माटुंगा वाहतूक विभागाचे पोलिस निरीक्षक संदीप मोरे म्‍हणाले, की टिळक उड्डाणपुलाचे काम सुरू असल्‍याने वाहतूक कोंडी होत आहे. कोतवाल उद्यान येथे वाहतूक वाढल्‍यास टिळक पुलावरही कोंडी होते. पुलाचे आतापर्यंत ८० टक्के काम झाले असून, २० टक्के काम बाकी आहे. ही वाहतूक कोंडी टाळण्यासाठी वाहतूक बदल करण्यात आले आहेत.

पर्यायी मार्ग
१) बी. ए. रोड दक्षिण वाहिनीवरून टिळक उड्डाणपुलावरून जाणारी अवजड वाहने टिळक उड्डाणपुलावरून न जाता ती सायन रुग्‍णालय जंक्शन येथून उजवे वळण, सुलोचना शेट्टी मार्गाने कुंभारवाडा जंक्शन डावे वळण, टी. एस. कटारिया मार्ग, कटारिया पूल शोभा हॉटेल डावे वळण, एल. जे. मार्गाने शिवसेना भवन डावे वळण, एन. सी. केळकार मार्गे प्लाझा सिनेमा येथून पुढे इच्छित स्थळी जातील.
२) बी. ए. रोड उत्तर वाहिनीवरून टिळक उड्डाणपुलावरून जाणारी अवजड वाहने टिळक उड्डाणपुलावरून न जाता ती दादर टीटी सर्कलवरून सरळ पुढे डॉ. बी. ए. रोडने महेश्वरी सर्कल, अरोरा जंक्शन, सायन रुग्‍णालय जंक्शन डावे वळण, सुलोचना शेट्टी मार्गाने कुंभारवाडा जंक्शन डावे वळण, टी. एस. कटारिया मार्ग कटारिया पूल, शोभा हॉटेल डावे वळण, एल. जे. मार्गाने शिवसेना भवन डावे वळण, एन. सी. केळकार मार्ग प्लाझा सिनेमा येथून पुढे इच्छित स्थळी जातील.
===