राज्य चित्रपट पुरस्कार सोहळा मंगळवारी मुंबईत

राज्य चित्रपट पुरस्कार
सोहळा मंगळवारी मुंबईत
मुंबई, ता. २ : साठच्या दशकात महाराष्ट्रातील मराठी चित्रपट, कलाकार आणि तंत्रज्ञांचा भव्यदिव्य सोहळ्यात सन्मान करून वाटचाल सुरू करणाऱ्या महाराष्ट्र राज्य मराठी चित्रपट पुरस्कारांचा हीरक महोत्सवी सोहळा मंगळवारी (ता. ५) सायंकाळी ६.३० वाजता वरळी येथील डोमच्या एसव्हीपी स्टेडियम येथे होणार आहे.

राज्याचे मुख्यमंत्री देवेंद्र फडणवीस यांच्या हस्ते या पुरस्कारांचे वितरण होणार आहे. या वेळी उपमुख्यमंत्री एकनाथ शिंदे, उपमुख्यमंत्री अजित पवार, सांस्कृतिक कार्य मंत्री ॲड. आशिष शेलार यांची प्रमुख उपस्थिती लाभणार आहे. या पुरस्कारांबरोबरच छत्रपती शिवाजी महाराज महावारसा पुरस्कार २०२५ या पुरस्काराची घोषणा करण्यात आली आहे. सांस्कृतिक वारसा आणि इतिहास जपणाऱ्या कार्यकर्त्यांचा गौरव या पुरस्काराने करण्यात येणार आहे. दरम्यान, ६० आणि ६१ वे महाराष्ट्र राज्य मराठी चित्रपट पुरस्कारही यावेळी प्रदान केले जाणार आहेत.
-----
मानकरी
- गजलनवाज भिमराव पांचाळे : गानसम्राज्ञी लता मंगेशकर पुरस्कार २०२५
- दिग्दर्शक, अभिनेते महेश मांजरेकर : चित्रपती कै. व्ही. शांताराम जीवन गौरव पुरस्कार २०२४
- अभिनेत्री मुक्ता बर्वे : चित्रपती कै. व्ही. शांताराम विशेष योगदान
- ज्येष्ठ अभिनेते अनुपम खेर : राज कपूर जीवनगौरव पुरस्कार २०२४
- अभिनेत्री काजोल : राज कपूर विशेष योगदान पुरस्कार