मिठी नदी घोटाळ्याप्रकरणी आरोपपत्र दाखल

मिठी नदी घोटाळ्याप्रकरणी आरोपपत्र दाखल
सकाळ वृत्तसेवा
मुंबई, ता. २ : मिठी नदी गाळ उपशातील गैरव्‍यवहार प्रकरणात आर्थिक गुन्हे शाखेने शुक्रवारी (ता. १) जय जोशी, केतन कदम या दोन मध्यस्थांविरोधात सुमारे सात हजार पानी आरोपपत्र दंडाधिकारी न्यायालयात सादर केले. अद्याप या आरोपपत्राची दखल न्यायालयाने घेतलेली नाही. सोमवारी (ता. ४) त्यावर घडामोड होण्याची शक्यता आहे.

आर्थिक गुन्हे शाखेने याप्रकरणी तीन पालिका अधिकारी, पाच ठेकेदार आणि तीन मध्यस्थांसह एकूण १३ जणांविरोधात गुन्हा नोंदवला होता. तपासातून या कंत्राटात सुमारे ६५ कोटींचा गैरव्‍यवहार झाल्याचे पुरावे हाती लागल्याचा दावा करून पोलिसांनी जोशी, कदम यांना अटक केली होती.

आरोपी कदमचा २०१९पर्यंत पेशा हॉटेलचालक असा होता. त्याला गाळ उपशाबाबत अनुभव नव्हता. तसेच वर्गो आणि व्होडर इंडिया या कंपन्यांत भागीदार किंवा संचालक नसताना ठेकेदारांसोबत गाळ उपशासाठी अद्ययावत यंत्रांसाठी झालेल्या भाडेकरारावर त्याच्या सह्या आढळल्या. ही यंत्रे कोची येथील मॅटप्रॉप टेक्निकल सर्व्हिसेस या उत्पादक कंपनीने ठेकेदारांसोबत स्वतः भाडेकरार करणे टाळले. त्याऐवजी वर्गो आणि व्होडर इंडिया या कंपन्यांसोबत हे करार केले गेले.

याशिवाय ठेकेदारांनी गाळ न उपसताच तो उपसला आणि ठरलेल्या ठिकाणी नेऊन टाकला, असा आभास निर्माण करून पालिकेकडून कोट्यवधींची बिले अदा करून घेतली, असा दावाही आर्थिक गुन्हे शाखेने केला होता. दरम्यान, या प्रकरणाचा समांतर तपास सक्तवसुली संचालनालयाने (ईडी) सुरू केला आणि आरोपींशी संबंधित ठिकाणांवर छापे घातले.