हृदयरोगाची ओळख पटवणे, उपचार अधिक सोपे
हृदयरोगाची ओळख पटवणे, उपचार अधिक सोपे
पालिका वैद्यकीय महाविद्यालयांना अद्ययावत मशीन
सकाळ वृत्तसेवा
मुंबई, ता. ३ : पालिका आता त्यांच्या नियंत्रणाखालील वैद्यकीय महाविद्यालये आणि रुग्णालयांसाठी अत्याधुनिक चार डी इकोकार्डियोग्राफी मशीन खरेदी करणार आहे. एकूण चार मशीन खरेदी केल्या जातील, ज्यामुळे हृदयरोग ओळखण्यात आणि उपचारांमध्ये मोठी मदत होईल. या निर्णयामुळे अनेक रुग्णांना फायदा होणार आहे.
चार डी इकोकार्डियोग्राफी ही हृदयाची चित्रे मिळवण्याची सर्वात प्रगत पद्धत आहे. नायर रुग्णालयाच्या कार्डिओलॉजी विभागाचे प्रमुख डॉ. अजय चौरसिया म्हणाले की, यामध्ये वास्‍तविक म्हणजेच तीन आयामांमध्ये हलणाऱ्या हृदयाचे फोटो हे व्हिडिओ स्वरूपात दिसतात. याद्वारे हृदयाची रचना, झडपा, स्नायू आणि रक्तप्रवाह क्रियाकलाप अगदी स्पष्टपणे पाहता येतात. हे तंत्र दोन डी इकोपेक्षा खूपच अचूक आणि तपशीलवार माहिती देते. दोन डी इको फक्त दोन आयामांमध्ये स्थिर प्रतिमा दर्शविते, ज्यामुळे डॉक्टरांना मर्यादित माहिती मिळते, तर चार डी इकोमध्ये, हृदयाच्या क्रियाकलाप चौथ्या आयामाशी, वेळेशी जोडलेले असतात. वेगवेगळ्या कोनातून हलणाऱ्या हृदयाच्या प्रत्येक भागाचे निरीक्षण करण्यास मदत होते. हे विशेषतः जटिल हृदयरोग, झडप विकार आणि हृदय अपयश यासारख्या परिस्थितींचे निदान करण्यासाठी खूप उपयुक्त ठरते.
अध्यापन, अभ्यास, संशोधनासाठी उपयुक्त
केईएम रुग्णालयाच्या हृदयरोग विभागाचे युनिटप्रमुख प्रा. डॉ. चरण लांजेवार म्हणाले की, चार डी इको जन्मजात विकृती आणि झडप बदलण्यासारख्या प्रक्रिया शोधण्यात खूप उपयुक्त ठरेल आणि प्रक्रिया अचूकपणे पार पाडण्यास मदत होईल. हे अत्याधुनिक मशीन अध्यापन, अभ्यास आणि संशोधनासाठीदेखील उपयुक्त ठरेल.