२५ वर्षापूर्वी घरासाठी अर्ज केलेल्यांना दिलासा

२५ वर्षांपूर्वी घरासाठी अर्ज केलेल्यांना दिलासा
म्हाडाने संपूर्ण इमारतच राखीव ठेवली; चितळसरसाठी आता केवळ सदनिका निश्चितीसाठी लॉटरी निघणार
सकाळ वृत्तसेवा
मुंबई, ता. ३ : म्हाडाच्या माध्यमातून हक्काच्या घराचे स्वप्न साकार व्हावे, यासाठी २५ वर्षांपूर्वी ठाणे चितळसर येथे घरे मिळावीत म्हणून अर्ज केलेल्या १५६ लॉटरी विजेत्या रहिवाशांना मोठा दिलासा मिळाला आहे. कोकण मंडळाने काढलेल्या घरांच्या लॉटरीत चितळसर येथील १,०५० घरांचा समावेश आहे. त्यापैकी १८१ घरे असलेली २७ मजली संपूर्ण इमारतच संबंधित अर्जदारांसाठी राखीव ठेवली आहे. त्यामुळे त्यांच्यासाठी केवळ सदनिका निश्चितीसाठी लॉटरी काढली जाणार आहे.
म्हाडाकडून सर्वसामान्यांच्या घरांचे स्वप्न पूर्ण करण्यासाठी सातत्याने लाॅटरी काढली जाते. त्याचप्रमाणे कोकण मंडळाने २००० मध्ये काढलेल्या लाॅटरीत चितळसर ठाणे येथील अत्यल्प आणि अल्प उत्पन्न गटातील २०० घरांचा समावेश होता. त्यानुसार अर्ज केलेल्या १५६ जणांना येथे घरे लागली खरी, पण या भूखंडावर आरक्षण असल्याचे तांत्रिक कारण पुढे करत महापालिकेने घरांच्या प्रकल्पाला परवानगी नाकारली होती. दरम्यान, म्हाडाच्या लाॅटरीत विजेते ठरलेल्या अर्जदारांना म्हाडाने त्यांच्याकडून घेतलेली अनामत रक्कम परत केली नव्हती. त्यामुळे ते घराच्या प्रतीक्षेत होते, मात्र म्हाडाने आता चितळसर येथे २७ मजली सात इमारती उभारल्या आहेत. त्यापैकी संपूर्ण एक इमारत मागील लॉटरी विजेत्यांसाठी राखीव ठेवली असून, त्यामध्ये १८१ घरे आहेत. त्यामुळे संबंधित लॉटरी विजेत्यांना घरे मिळणार असल्याचे निश्चित झाले आहे.

किमती कमी करण्याबाबत हालचली
म्हाडने २००० मध्ये काढलेल्या लाॅटरीत अत्यल्प उत्पन्न गटासाठी असलेल्या १४३ चौरस फुटांच्या घराची किंमत केवळ ६५ हजार रुपये होती, तर अल्प उत्पन्न गटातील २१५ चौरस फुटांच्या घराची एक लाख ८७ हजार ५०० रुपये एवढी कमी किंमत होती. आता म्हाडाने विक्रीसाठी काढलेल्या चितळसर येथील अल्प उत्पन्न गटातील सुमारे ३५० चौरस फुटांच्या घराची किमती ५२ लाखांच्या घरात आहे. किमती आमच्या आवाक्याबाहेर असल्याने म्हाडाने आमचा सहानभूतीपूर्वक विचार करावा, अशी मागणी विजेत्या अर्जदारांनी म्हाडाकडे केली आहे. त्या पार्श्वभूमीवर घरांच्या किमती कशा कमी करता येतील, याबाबत म्हाडाकडून हालचाली सुरू झाल्या आहेत.

- लॉटरी विजेते - १५६
- उपलब्ध राखीव घरे - १८१
- २००० ची २१५ चौरस फुटांच्या घरांची किंमत - एक लाख ८७ हजार
- सध्याची ३५० चौरस फुटांच्या घरांची किंमत - ५२ लाख