‘अवयवदान पंधरवड्या’ला राज्यभरात सुरुवात

‘अवयवदान पंधरवड्या’ला
राज्यभरात सुरुवात

आरोग्यमंत्री प्रकाश आबिटकर यांनी घेतली शपथ

सकाळ वृत्तसेवा
मुंबई, ता. ३ : राज्यातील अवयवदानाचे प्रमाण वाढावे आणि अवयवदानाच्या प्रतीक्षेतील रुग्णांना नवजीवन मिळावे, यासाठी राज्यात आजपासून विविध उपक्रमांनी ‘अवयवदान पंधरवडा’ साजरा करण्यात येत आहे. सार्वजनिक आरोग्य आणि कुटुंब कल्याणमंत्री प्रकाश आबिटकर यांनी आज अर्ज भरून अवयवदानाची शपथ घेऊन अभियानाचा प्रारंभ केला.
अंगदान जीवनदान संजीवनी अभियानासाठी राज्य सरकारने पुढाकार घेतला आहे. १५ ऑगस्टपर्यंत अवयवदान पंधरवडा सुरू राहणार आहे. या कालावधीत व्यापक जनजागृती व समाजाभिमुख उपक्रम राबवण्याचे निर्देश सार्वजनिक आरोग्य व कुटुंब कल्याणमंत्री प्रकाश आबिटकर यांनी दिले आहेत.

या पंधरवड्यात शाळा, महाविद्यालये, स्वयंसेवी संस्था, धार्मिक संस्था, आरोग्य संस्था व सामाजिक कार्यकर्त्यांचा सक्रिय सहभाग असणार आहे. अवयवदान क्षेत्रातील संस्था रोट्टो, सोट्टो, विभागीय प्रत्यारोपण समन्वय समित्या व झेडटीसीसी, मुंबई, पुणे नागपूर व छत्रपती संभाजीनगर यांच्या सहकार्याने हे अभियान राज्यभरात राबविण्यात येणार आहे.
१५ ऑगस्टला जिल्हास्तरावर पालकमत्र्यांचे हस्ते अवयवदात्यांच्या कुटुंबीयांचा सन्मान करून मोहिमेला प्रेरणादायी रूप दिले जाणार आहे.
राज्यातील जनतेने या अभियानात सहभागी होऊन अवयवदानाची शपथ घ्यावी, असे आवाहन आरोग्यमंत्री आबिटकर यांनी केले आहे.