श्रींच्या आगमनासाठीही वाहतूक नियोजन हवे!

श्रींच्या आगमनासाठीही वाहतूक नियोजन हवे!
पोलिस आयुक्तांना पत्र

सकाळ वृत्तसेवा
मुंबई, ता. ३ : गणेशोत्सवाच्या पार्श्वभूमीवर विसर्जन दिवशी जसे ठोस वाहतूक नियोजन केले जाते, तसेच नियोजन श्रींच्या आगमनाच्या दिवशीही करण्यात यावे, अशी मागणी बृहन्मुंबई सार्वजनिक गणेशोत्सव समन्वय समितीचे अध्यक्ष ॲड. नरेश दहिबावकर यांनी मुंबई पोलिस आयुक्त देवेन भारती यांच्याकडे पत्राद्वारे केली आहे.
मुंबईतील कारखान्यांमधून येत्या काही दिवसांत हजारो मंडळे आपापल्या सोसायट्यांमध्ये श्रींच्या मूर्ती नेणार आहेत. विशेषतः दादर, परळ, लालबाग या भागांतून मोठ्या संख्येने मूर्ती बाहेर पडतात. त्यामुळे या वेळीही नियोजित वाहतूक नियंत्रण गरजेचे असल्याचे दहिबावकर यांनी स्पष्ट केले आहे. गौरी विसर्जन आणि अनंत चतुर्दशीला गिरगाव, दादर चौपाटीच्या दिशेने एकेरी वाहतूक केली जाते आणि दुसऱ्या बाजूने फक्त विसर्जनासाठी वाहनांना परवानगी दिली जाते. अगदी त्याच धर्तीवर श्रींच्या आगमनाच्या दिवशीही नियोजन करण्यात आल्यास रस्त्यांवरील गोंधळ आणि वाहतूक कोंडी टाळता येईल, असे दहिबावकर म्हणाले. वाहतूक नियोजनाअंती गणेशमूर्ती रस्त्यावर कुठेही थांबू नयेत, याची काळजी घेता येईल. यासाठी वाहतूक पोलिसांनी संबंधित भागात तात्पुरते ‘नो पार्किंग’ झोन तयार करावेत, अशीही सूचना त्यांनी दिली आहे. यामुळे मूर्ती घेऊन जाणाऱ्या मंडळांना अडथळ्याशिवाय पुढे जाता येईल आणि इतर वाहनेही कमी गतीने का होईना पण सुरळीतपणे चालू शकतील.
...
समन्वयाने नियोजन करावे!
मूर्तिकार, सार्वजनिक मंडळांचे प्रतिनिधी, वाहतूक पोलिस, मुंबई पोलिस आणि महापालिका वॉर्ड अधिकारी यांनी परस्पर समन्वय साधून नियोजन केल्यास श्रींच्या आगमनाचा संपूर्ण सोहळा नियोजनबद्ध, शांततेत आणि अडथळ्यांविना पार पडू शकेल, असा विश्वास दहिबावकर यांनी व्यक्त केला आहे. ठोस नियोजन केल्यास श्री गणेशांच्या स्वागताचा आनंद द्विगुणित होईल, असे मत अनेक मंडळांनीही व्यक्त केले आहे.