पुण्यातील ११ रुग्णालयांना तूर्तास दिलासा

पुण्यातील ११ रुग्णालयांना
तूर्तास दिलासा
मुंबई, ता. ३ : पुण्यातील धर्मादाय रुग्णालयांना महात्मा जोतीराव फुले जनआरोग्य योजनेची सक्ती करण्याच्या सरकारच्या निर्णयाविरोधात याचिका दाखल करण्यात आली आहे. या याचिकेची दखल घेऊन उच्च न्यायालयाने पुण्यातील दीनानाथ मंगेशकर रुग्णालयासह ११ रुग्णालयांना नुकताच तात्पुरता दिलासा दिला आहे. निर्णयाला स्थगिती दिली नसली तरी सक्ती करण्यापूर्वी रुग्णालयांशी सल्लामसलत गरजेची होते, असे म्हटले आहे. तसेच याचिकाकर्त्यांना दोन आठवड्यांत सरकारकडे म्हणणे मांडण्याची मुदत दिली आहे. त्यानंतरच सरकारने निर्णय घ्यावा, असे आदेश न्या. रेवती मोहिते-डेरे आणि डॉ. न्या. नीला गोखले यांच्या खंडपीठाने दिले.