भायखळ्यात इमारतीचा भाग कोसळला

भायखळ्यात म्हाडाची इमारत कोसळली

मुंबई, ता. ४ : भायखळा पश्चिमेतील मदनपुरा पोस्ट ऑफिसजवळील म्हाडाच्या तीन मजली इमारतीचा काही भाग कोसळल्याची घटना सोमवारी (ता. ३) पहाटे घडली. ही इमारत पूर्वीच धोकादायक ‘सी-१’ श्रेणीत वर्गीकृत घोषित करून रिकामी करण्यात आली होती. त्यामुळे जीवितहानी टळली.
प्राथमिक माहितीनुसार, या इमारतीच्या पहिल्या आणि तिसऱ्या मजल्याच्या मागील बाजूचा भाग अचानक कोसळला. अग्निशमन दलाकडून प्राप्त माहितीनुसार, ही संपूर्ण इमारत कोसळली आहे. घटनास्थळी म्हाडाचे कर्मचारी, मुंबई फायर ब्रिगेड, पोलिस, १०८ अ‍ॅम्बुलन्स सेवा आणि पालिकेच्या वॉर्ड कर्मचाऱ्यांची तातडीने उपस्थिती होती. सध्या ढिगाऱ्याखाली कोणीही अडकल्याची माहिती नाही आणि कोणतीही दुखापत झालेली नाही. ही इमारत आधीच धोकादायक मानून रिकामी केली गेल्यामुळे मोठा अनर्थ टळला. म्हाडा आणि पालिकेच्या समन्वयामुळे जीवितहानी टाळता आली. सध्या घटनास्थळी साफसफाई आणि सुरक्षा कार्य सुरू आहे. ही घटना धोकादायक इमारतींवर तत्काळ उपाययोजना करणे आवश्यक आहे, याची पुन्हा एकदा जाणीव करून देणारी आहे.