ड्रोनच्या वापरामुळे गुन्हा दाखल पाच तरुणांविरोधात कारवाई; ड्रोन जप्त

ड्रोनच्या वापरामुळे गुन्हा दाखल
पाच तरुणांविरोधात कारवाई; ड्रोन जप्त

मुंबई, ता. ५ : काळाचौकीच्या महागणपतीची आगमन मिरवणूक शूट करण्यासाठी ड्रोनचा अवैध वापर करणाऱ्या पाच तरुणांविरोधात रविवारी (ता. ३) काळाचौकी पोलिसांनी गुन्हा दाखल केला.
काळाचौकीच्या सार्वजनिक मंडळाने आयोजित केलेल्या आगमन मिरवणुकीत काळाचौकी पोलिसांना मिरवणुकीवर उडणारे तीन ड्रोन आढळले. पोलिसांनी तातडीने हे ड्रोन खाली उतरवून, त्यानंतर ड्रोन उडवणाऱ्या पाच तरुणांना चौकशीसाठी ताब्यात घेतले. दरम्यान, पोलिसांनी तरुणांकडे परवानगीबाबत विचारणा केली असता, ती नसल्याने बंदी आदेशाचे उल्लंघन केल्याचा गुन्हा त्यांच्याविरोधात नोंदवण्यात आला. दीपेश राठोड, जय राठोड, ओंकार तटकरे, संजोग कोळिस्ते आणि यश कदम अशी या तरुणांची नावे आहेत. हे सर्व पेशाने छायाचित्रकार असल्याची माहिती त्यांनी पोलिसांना दिली आहे.

मिरवणुकीत मोबाईल चोरांची धूम
महागणपतीच्या मिरवणुकीत अनेकांचे मोबाईल फोन चोरट्यांनी लांबविले. याचा गुन्हा नोंदवून केलेल्या कारवाईत पोलिसांनी दोन चोरट्यांना अटक करून पाच महागडे मोबाईल त्यांच्याकडून जप्त केले.