महापालिका करणार स्वतः कचरा संकलन

महापालिका करणार
स्वतः कचरा संकलन
खासगी संस्थेची सेवा घेणार नसल्याचा निर्णय
सकाळ वृत्तसेवा
मुंबई, ता. ५ : मुंबईतील सर्व निवासी आणि व्यावसायिक संस्थांकडून महापालिका स्वतः कचरा संकलित करणार आहे. यापुढे कुठलीही संस्था खासगी किंवा त्रयस्थ एजन्सीकडून कचरा वाहून नेण्यासाठी सेवा घेणार नाही आणि त्यांना पैसेही देणार नाही, अशी माहिती अतिरिक्त आयुक्त डॉ. अश्विनी जोशी यांनी दिली.
महापालिकेच्या या निर्णयामुळे मोठ्या प्रमाणात कचरा निर्माण करणाऱ्या संस्थांकडून होणारी अनियमितता थांबणार आहे. याच पार्श्वभूमीवर नुकत्याच झालेल्या बैठकीत डॉ. जोशी यांनी सर्व वॉर्ड पातळीवर सहाय्यक मुख्य निरीक्षकांच्या नेतृत्वाखाली पथके स्थापन करण्याचे आदेश दिले. ही पथके सात दिवसांत माहिती संकलित करून प्रत्येक संस्थेचा करार, शुल्क व कचरा व्यवस्थापन करणाऱ्या एजन्सीचे तपशील मिळवणार आहेत.
घनकचरा व्यवस्थापन धोरणाचा आढावा सुरू असल्याने २०२५-२६ची नोंदणी प्रक्रिया लांबणीवर टाकण्यात आली आहे. यामुळे संपूर्ण जबाबदारी महापालिकेच्या खांद्यावर आली आहे. तांत्रिक आणि वाहतूक सुविधा कार्यान्वित करण्याची जबाबदारी संबंधित अभियंत्यांना देण्यात आली आहे.
..........