पालिका रुग्णालयांत अँटी-रेबीज लसीचा तुटवडा

पालिका रुग्णालयांत रेबीजविरोधी लशीचा तुटवडा
श्‍वानदंश झालेल्‍या नागरिकांची गैरसोय
सकाळ वृत्तसेवा
मुंबई, ता. ६ : पालिकेची दवाखाने आणि रुग्णालयांमध्ये रेबीजविरोधी लस उपलब्ध नसल्‍याने श्‍वानदंश झालेल्‍या नागरिकांची उपचाराअभावी गैरसोय होत आहे. लोकांना लशीसाठी एका केंद्रातून दुसऱ्या केंद्रात जावे लागते.
पालिकेच्या वैद्यकीय महाविद्यालयाशी संबंधित एका अधिकाऱ्याने नाव न सांगण्याच्या अटीवर सांगितले, की जवळजवळ सर्व वैद्यकीय महाविद्यालयांची हीच स्थिती आहे. नायरमध्ये काही लशीच्या कुपी आल्या आहेत, म्हणून आम्ही आता लोकांना तिथे पाठवत आहोत. पालिका दवाखान्यातील एका कर्मचाऱ्याने सांगितले, की गेल्या पाच ते सहा दिवसांपासून ही लस उपलब्ध नाही. लोकांना इतर रुग्णालयांमध्ये जाण्यास सांगितले जात आहे. जवळपास सर्वच दवाखान्यांमध्ये हीच परिस्थिती आहे. आम्हाला पुरेसा साठा मिळत नाही.
दहिसर येथील रहिवासी सागर जुनघरे म्हणाले, की मला कुत्र्याने चावा घेतला आणि सोमवारी दहिसरमधील दोन आपला दवाखान्यात गेलो, पण तिथे मला सांगण्यात आले की लस नाही, दुसरीकडे पाहा. मंगळवारी मी भगवती रुग्णालयात गेलो असता त्यांनी बुधवारी सकाळी मला फोन केला.
पालिका आरोग्य विभागातील एका सूत्राने सांगितले, की दवाखान्यामधून स्थानिक पातळीवर लस खरेदी करण्यास सांगितले आहे, परंतु ते फक्त ५,००० रुपयांपर्यंत खरेदी करू शकतात. त्यात किती कुपी येणार? तर पालिका दवाखान्यात आणि रुग्णालयात दररोज सरासरी १८० लोकांना कुत्रे चावतात.
आरोग्य विभागाच्या एका अधिकाऱ्याने नाव न सांगण्याच्या अटीवर सांगितले, की कुत्र्यांच्या चाव्यामुळे रेबीजचा आजार होतो. हा आजार खूप धोकादायक आणि असाध्य आहे. त्यामुळे कुत्रा चावल्यानंतर लगेच रेबीजविरोधी इंजेक्शन घेणे अत्यंत आवश्यक आहे.