‘साई संजीवनी’ संस्थेच्या आर्थिक देणीवर टाच

‘साई संजीवनी’ संस्थेच्या आर्थिक देणीवर टाच
व्ही.एन. देसाई रुग्णालयातील बनावट डॉक्टरप्रकरणी कारवाईचा बडगा!
सकाळ वृत्तसेवा
मुंबई, ता. ५ : सांताक्रूझ येथील व्ही.एन. देसाई रुग्णालयात बनावट शैक्षणिक पात्रतेच्या डॉक्टरांच्या नियुक्तीच्या प्रकरणावर महापालिका प्रशासनाने कठोर पाऊल उचलले आहे. या प्रकरणातील कंत्राटदार संस्था ‘साई संजीवनी’ यांच्यावर कारवाई करत नोव्हेंबर २०२४ पासून सर्व आर्थिक देणी स्थगित करण्यात आली असून संस्थेला दोन वेळा कारणे दाखवा नोटीस बजावण्यात आली आहे. तिसरी नोटीस लवकरच पाठवली जाणार आहे.
रुग्णालयाने ‘साई संजीवनी’ या संस्थेसोबत करार करून प्रशिक्षित डॉक्टर पुरवण्याची जबाबदारी दिली होती; मात्र फेब्रुवारी २०२५ मध्ये या डॉक्टरांच्या पात्रतेची चौकशी करण्यात आली असता, महाराष्ट्र वैद्यकीय परिषदेने त्यांच्या कागदपत्रांना वैधता नाकारली. यामध्ये एमएमसी प्रमाणपत्रही अवैध ठरवण्यात आले.
या गंभीर प्रकाराची रुग्णालय प्रशासनाने वेळीच दखल घेतली असून, संपूर्ण करारातील अटींचे उल्लंघन झाल्याने कंत्राटदार संस्थेविरोधात कायदेशीर प्रक्रिया सुरू करण्यात आली आहे. विधी विभागाचा सल्लाही घेतला गेला असून, याप्रकरणी कठोर कारवाई होणार असल्याचे स्पष्ट करण्यात आले आहे.
दरम्‍यान, रुग्णालय प्रशासनाने नागरिकांना आश्वस्त करीत सांगितले, की बनावट डॉक्टरांना कोणतीही अधिकृत मान्यता दिली गेली नसून रुग्णसेवेबाबत कोणतीही तडजोड केली जाणार नाही. नियमबाह्य वागणाऱ्यांविरोधात भविष्यातही कठोर कारवाई केली जाईल.
.........