ग्रामीण रुग्णालयांत आता अवयव काढण्याची सुविधा

ग्रामीण रुग्णालयांत आता अवयव काढण्याची सुविधा

सकाळ वृत्तसेवा
मुंबई, ता. ६ : राज्यातील जिल्हा आणि उपजिल्हा सरकारी रुग्णालयांमध्ये मेंदूमृत रुग्णांचे अवयव काढण्यासाठी सुविधा उपलब्ध करून देण्यात येणार आहे. ही रुग्णालये प्रत्यारोपण नसलेली अवयव पुनर्प्राप्ती केंद्रे म्हणून काम करतील, अशी माहिती राज्य अवयव आणि ऊती प्रत्यारोपण संघटनेचे (रोटो-सोटो) पश्चिम विभागाचे संचालक डॉ. आकाश शुक्ला यांनी दिली.
रस्ते अपघातांसह बहुतेक गंभीर प्रकरणे सरकारी रुग्णालयांमध्ये येत असल्याने, ग्रामीण रुग्णालयांमध्येही अशा सुविधा देण्याचा निर्णय राज्य सरकारने घेतला आहे. यासोबतच रोटो-सोटोतर्फे अवयवदानाबाबत जनजागृतीसाठी विशेष मोहिमा राबवण्यात येत आहेत. आरोग्यमंत्री प्रकाश आबिटकर यांनी ३ ते १५ ऑगस्टदरम्यान अवयवदान पंधरवडा साजरा करण्याचे निर्देश दिले असून, त्या पार्श्वभूमीवर विविध कार्यक्रमांचे आयोजन करण्यात आले आहे. ५ ऑगस्टला दात्याच्या कुटुंबाचा सत्कार करण्याचा कार्यक्रम पार पडणार आहे. आरोग्यसेवा कर्मचाऱ्यांसाठी ऑनलाइन प्रशिक्षण मॉड्युल तयार करण्यात आले असून, वैद्यकीय व नर्सिंग विद्यार्थ्यांसाठी प्रश्नमंजूषा स्पर्धाही झाली आहे. जिल्हा रुग्णालयांमध्ये बॅनर, पोस्टर्सद्वारे प्रबोधन सुरू आहे. राज्यात सध्या नऊ हजारांहून अधिक रुग्ण अवयवांच्या प्रतीक्षेत असून, वेळेवर अवयव उपलब्ध झाल्यास अनेकांचे प्राण वाचू शकतात, असे डॉ. शुक्ला म्हणाले.