मूल्यमापन चाचणीसाठी अपुऱ्या प्रश्नपत्रिका

मूल्यमापन चाचणीसाठी अपुऱ्या प्रश्नपत्रिका
ऐनवेळी झेरॉक्ससाठी धावाधाव; परीक्षेपूर्वी यूट्यूबवर प्रसिद्ध

मुंबई, ता. ६ ः राज्य शैक्षणिक व संशोधन परिषदेकडून (एससीईआरटी) राज्यातील सरकारी, अनुदानित शाळेतील दुसरी ते आठवीच्या विद्यार्थ्यांसाठी सुरू असलेल्या संकलित मूल्यमापन चाचणी परीक्षेसाठी अनेक केंद्रावर अपुऱ्या प्रश्नपत्रिका उपलब्ध झाल्याने मुख्याध्यापक आणि शिक्षकांची तारांबळ उडाली. ऐनवेळी प्रश्नपत्रिकेची झेरॉक्स काढण्यासाठी त्यांना धावाधाव करावी लागली. दरम्यान, गणिताची प्रश्नपत्रिका परीक्षेपूर्वी प्रसिद्ध झाल्याप्रकरणी तीन यूट्यूब चॅनलविरोधात गुन्हा दाखल करण्यात आला आहे.
संकलित मूल्यमापन चाचणीसाठी मुंबईत बहुतांश परीक्षा केंद्रावर बुधवारी पहिल्या दिवशी भाषा विषयाच्या प्रश्नपत्रिका अपुऱ्या पडल्या. त्यामुळे झेरॉक्स काढण्यासाठी शाळा प्रशासनाची धावपळ झाली. त्यामुळे प्रत्यक्ष परीक्षा सुरू होण्यास विलंब झाला. तसेच परीक्षेपूर्वी गणिताच्या प्रश्नपत्रिका आणि त्याच्या उत्तरपत्रिका तीन यूट्यूब चॅनलवर प्रसिद्ध झाल्याने एकूणच परीक्षेविषयी प्रश्नचिन्ह उपस्थित झाल्याचे मुख्याध्यापक संघटनेचे माजी समन्वयक व शिक्षण तज्ञ महेंद्र गणपुले यांनी सांगितले.
----
यूट्यूब चॅनलवर गुन्हे दाखल
मूल्यमापन चाचणी परीक्षेच्या प्रश्नपत्रिका आणि उत्तरपत्रिका यूट्यूब चॅनेलवर प्रसिद्ध झाल्याची दखल एससीईआरटीने घेतली आहे. त्यानुसार तीन यूट्यूब चॅनलवर गुन्हे दाखल करण्यात आल्याची माहिती एससीईआरटीचे संचालक राहुल रेखावार यांनी दिली.