‘अभंगवारी’चा दशकपूर्तीचा सोहळा!

‘अभंगवारी’चा दशकपूर्ती सोहळा!
सकाळ वृत्तसेवा
मुंबई, ता. ७ : ऑगस्ट महिन्यात मुंबईतील वातावरण भक्तिरसांनी भारले जाणार आहे. अभंगवारी या कार्यक्रमाच्या माध्यमातून मराठी भक्तिसंगीताची परंपरा साजरी होत असून, यंदा या भव्य संगीत महोत्सवाला १० वर्षे पूर्ण होत आहेत. हा विशेष कार्यक्रम येत्या शनिवारी (ता. ९) बोरिवली येथील प्रबोधनकार ठाकरे नाट्यमंदिरात होणार आहे.
त्रवसंतोत्सव प्रेरित ‘अभंगवारी’ या उपक्रमामध्ये आजवर अनेक नामवंत आणि उभरते कलाकार एकत्र आले आहेत आणि यंदाही ही परंपरा कायम राहणार आहे. सूगी आयोजित या वर्षीची ‘अभंगवारी’ राखी पौर्णिमा या पवित्र सणाच्या दिवशी होत असल्यामुळे बंधुभावाच्या या नात्याला संगीताच्या माध्यमातून एक नवा, भावनिक आणि आध्यात्मिक साज चढणार आहे. राहुल देशपांडे आणि दीप्ती माटे आपल्या सुरेल भक्तिपदांनी प्रेक्षकांना मंत्रमुग्ध करतील आणि बंधुभावाच्या या पवित्र नात्याचा प्रेममय अनुभव देतील. राहुल देशपांडे हे भारतीय शास्त्रीय संगीताचे आघाडीचे गायक असून ख्याल, नाट्यसंगीत आणि अभंग गायनात त्यांनी आपली वेगळी ओळख निर्माण केली आहे. तर दीप्ती माटे या त्यांच्या भावपूर्ण आवाजासाठी ओळखल्या जातात. संत तुकाराम, संत ज्ञानेश्वर यांसारख्या संतांच्या कालातीत अभंगांना आजच्या पिढीपर्यंत पोहोचवणारा हा कार्यक्रम आपल्या आत्म्यालाही एक आनंददायी स्पर्श देऊन जाईल.