बाळाला विकणारी टोळी गजाआड

बाळाला विकणारी टोळी गजाआड
जन्माआधीच ठरला सौदा

मुंबई, ता. ७ ः जन्माआधीच बाळाचा सौदा करून जन्माला आलेल्या नवजात बालकाची लाखो रुपयांना विक्री करणाऱ्या टोळीतील दोन महिलांना गोवंडी येथील शिवाजीनगर पोलिसांनी बुधवारी (ता. ७) संध्याकाळी अटक केली.
या महिलांच्या ताब्यात सहा दिवसांचे बाळ होते. ते त्या ५.५० लाख रुपयांना विकणार होत्या. याप्रकरणी पोलिसांनी अटकेतील दोन महिला, बालकाच्या पालकांसह पाच जणांविरोधात गुन्हा नोंदवला. या प्रकरणात समीर नावाच्या व्यक्तीचा सहभाग पुढे आला असून, त्याचा शोध सुरू असल्याचे पोलिसांनी सांगितले. या टोळीने याआधी या परिसरातील खासगी रुग्णालयांमध्ये जन्माला आलेल्या आणखी काही बालकांची विक्री केल्याची माहिती पुढे आली आहे. शिवाजीनगर परिसरात नवजात बालकांची विक्री होणार, अशी गोपनीय माहिती पोलिसांना समाजसेवकांच्या माध्यमातून प्राप्त झाली होती. पोलिसांनी दिलेल्या माहितीनुसार या समाजसेवकाने काही दिवसांपूर्वी ग्राहकाच्या वेशात समीर नावाच्या व्यक्तीशी संपर्क साधला. त्याने एक महिला प्रसूत होणार असून मुलगी झाली तर ४.५० लाख आणि मुलगा झाला तर ५.५० लाख रुपये रोख मोजावे लागतील, असे सांगितले. त्याने बुधवारी पहाटे या समाजसेवकास संपर्क साधून मुलगा झाला असून, आजच्या आज व्यवहार करावा लागेल, असे सांगत भेटीसाठी परिसरातील लोटस जंक्शन हे ठिकाण ठरवले. ठरल्या वेळेत दोन महिला सहा दिवसांचे बाळ घेऊन आल्या. पोलिसांनी त्यांना ताब्यात घेतले. महिमा शेख ऊर्फ नसरीन, फातिमा महमूदअली अशी त्यांची नावे आहेत. हे बाळ सुमया खान आणि इरफान खान यांचे असून, त्यांनीच ते समीर यास विकण्यास सांगितले होते, अशी कबुली या दोघींनी दिल्याचे पोलिसांनी सांगितले.