म्हाडाच्या मुंबईतील १४९ अनिवासी गळ्याचा होणार ई-लिलाव

म्हाडाच्या मुंबईतील १४९ अनिवासी गाळ्यांचा ई-लिलाव
नोंदणी, अर्ज प्रक्रियेला १२ ऑगस्टपासून सुरुवात
सकाळ वृत्तसेवा
मुंबई, ता. ७ : मुंबई गृहनिर्माण व क्षेत्रविकास मंडळातर्फे (म्हाडाचा विभागीय घटक) मुंबईमधील विविध गृहनिर्माण प्रकल्पांच्या परिसरातील अनिवासी गाळ्यांची विक्री केली जाणार आहे. ही विक्री प्रक्रिया ई-लिलावाद्वारे होणार असून, त्यासाठी ऑनलाइन नोंदणी व अर्ज प्रक्रियेला १२ ऑगस्ट रोजी दुपारी १२ वाजेपासून प्रारंभ होणार आहे आहे. या ई-लिलावाचा एकत्रित निकाल २९ ऑगस्ट रोजी जाहीर केला जाणार आहे.
म्हाडाच्या ऑनलाइन ई-लिलावात मुंबईतील मुलुंड गव्हाणपाडा येथील सहा अनिवासी गाळे, कुर्ला - स्वदेशी मिल येथील पाच, तुंगा पवई येथे दोन, कोपरी पवई २३, चारकोप २३, जुने मागाठाणे बोरिवली पूर्व सहा, महावीरनगर कांदिवली पश्चिम सहा अनिवासी गाळे, प्रतीक्षानगर सायन नऊ, अँटॉप हिल वडाळा तीन, मालवणी मालाड येथे ४६ अनिवासी गाळे, बिंबिसारनगर गोरेगाव पूर्व येथे १७ अनिवासी गाळे व शास्त्रीनगर-गोरेगाव, सिद्धार्थनगर, मजासवाडी जोगेश्वरी पूर्व येथे प्रत्येकी एक अनिवासी गाळा विक्रीसाठी उपलब्ध असल्याचे मुंबई मंडळाचे मुख्य अधिकारी मिलिंद बोरीकर यांनी स्पष्ट केले आहे.

२८ ऑगस्टला सकाळी ११ वाजेपासून सायंकाळी ५ वाजेपर्यंत संगणकीय प्रणालीमध्ये पात्र ठरलेल्या अर्जदारांसाठी ऑनलाइन बोली स्वरूपातील ई-लिलाव www.eauction.mhada.gov.in या संकेतस्थळावर होणार आहे. २९ ऑगस्ट रोजी सकाळी ११ वाजता https://eauction.mhada.gov.in व https://mhada.gov.in या दोन्ही संकेतस्थळांवर ई-लिलावाचा एकत्रित निकाल जाहीर करण्यात येणार आहे.

२५ ऑगस्टपर्यंत मुदत
मुंबई मंडळातील अनिवासी गाळ्यांच्या ई-लिलाव प्रक्रियेत भाग घेण्यासाठी https://eauction.mhada.gov.in संकेतस्थळावर नोंदणी करणे, ऑनलाइन अर्ज करणे, कागदपत्रे अपलोड करणे, अनामत रक्कम ऑनलाइन भरणे यासाठी १२ ऑगस्ट रोजी दुपारी १२ वाजेपासून ते २५ ऑगस्ट रोजी रात्री ११.५९ वाजेपर्यंत मुदत देण्यात आली आहे.