बाळ विकण्याचा कट पालकांचाच

बाळ विकण्याचा कट पालकांचाच
हलाखीची परस्थिती सुधारण्याची धडपड

मुंबई, ता. ८ ः गोवंडी येथे नुकताच जन्म घेतलेल्या बाळाच्या विक्री प्रकरणात धक्कादायक माहिती पोलिस तपासातून पुढे आली आहे. तीन मुलांच्या पाठीवर होणारे बाळ, मग ते मुलगा असो की मुलगी, विकायचे, असा कट पालकांनीच रचला होता. हलाखीची आर्थिक परिस्थिती सुधारण्यासाठी त्यांनी हे पाऊल उचलल्याचे समजते.
इरफान आणि सुमाया खान असे या बाळाच्या आई-वडिलांचे नाव असून, शिवाजीनगर पोलिसांनी त्यांना या प्रकरणात अन्य दोन महिलांसह अटक केली आहे. इरफान याचा शिवाजीनगर परिसरात चप्पल विक्रीचा छोटेखानी व्यवसाय असून, सुमाया गृहिणी आहे. आर्थिक परिस्थिती बेताची असलेल्या या दाम्पत्याला तीन मुले आहेत. सुमाया चौथ्यांदा गरोदर राहिली तेव्हा गर्भपात करावा की बाळाला जन्म द्यावा या विवंचनेत हे दाम्पत्य होते. पुढे प्रसूतीची वेळ जवळ येऊ लागली तसे या दोघांनी हे बाळ विकून येईल त्या रकमेतून बेताच्या आर्थिक परिस्थितीस टेकू लावण्याचा निर्णय घेतला. दरम्यान, हा विक्री व्यवहार जुळवून आणणारा मुख्य आरोपी समीर या दाम्पत्याच्या संपर्कात आला. त्याने सुमायाला होणाऱ्या बाळाला विकत घेणारा ग्राहक शोधण्यास सुरुवात केली. मुलगी झाली तर चार आणि मुलगा झाला तर साडेपाच लाख रुपये ही किंमत समीरने ठरवली. त्यातील दोन लाख रुपये इरफान व सुमाया यांना मिळणार होते. समीरचा शोध कसोशीने सुरू आहे. त्याला अटक झाल्यास या प्रकरणाशी निगडित बरीचशी माहिती उघड होईल. तसेच त्याने याआधी अशा प्रकारे गोवंडीसह शहरातील अन्य भागातून नुकत्याच जन्मलेल्या बाळांची विक्री केली आहे का, हेही स्पष्ट होऊ शाकेल, अशी माहिती तपासही संबंधित वरिष्ठ अधिकाऱ्याने दिली. दरम्यान, बाळाला पोलिसांनी ताब्यात घेत चेंबूर येथील बाल आनंद होम या संस्थेकडे संगोपनासाठी दिले आहे. तेथे या बळाची योग्यरीत्या काळजी घेतली जात असल्याचे पोलिसांनी सांगितले.
...
कौटुंबिक पेशा?
समीर याच्या कुटुंबातील अन्य सदस्यांविरोधात अशा प्रकारे बालकांच्या विक्रीचे गुन्हे नोंद आहेत. ट्रॉम्बे येथे राहणाऱ्या त्याच्या मावशीविरोधात नवजात बाळ विकल्याबद्दल गुन्हे नोंद असल्याची माहिती शिवाजीनगर पोलिसांना मिळाली आहे.
...
असे उघड झाले प्रकरण
समीर नुकतेच जन्माला आलेले बाळ विकण्यासाठी ग्राहकाच्या शोधात असल्याची माहिती शिवाजीनगर परिसरातील एका समाजसेवी संस्थेस मिळाली. या संस्थेच्या कार्यकर्त्यांनी ग्राहक असल्याचे भासवत समीरशी संपर्क साधला. त्याने दोन दिवसांपूर्वी संपर्क साधून १ जुलै रोजी जन्माला आलेले बाळ (सुमायाने जन्म दिलेला मुलगा) उपलब्ध असून, साडेपाच लाख रुपये रोख घेऊन या कार्यकर्त्यांना परिसरातील लोटस जंक्शन येथे बोलावले. तोवर या कार्यकर्त्यांनी संपूर्ण बाब शिवाजीनगर पोलिस ठाण्याच्या वरिष्ठ निरीक्षक अनघा सातवडे यांच्या कानी घातली. त्यांच्या देखरेखीखाली सापळा रचण्यात आला. त्यात बाळ घेऊन आलेल्या समीरच्या टोळीतील दोन महिलांना ताब्यात घेण्यात आले.