उपसचिवाचा पीए असल्याचे भासवत दुकानदाराची फसवणूक

उपसचिवाचा पीए असल्याचे भासवत दुकानदाराची फसवणूक
मुंबई, ता. ८ : मंत्रालयीन उपसचिवाचा स्वीय सहाय्यक असल्याचे भासवून पेडर रोड येथील एका किराणा दुकान मालकाला सुमारे ६.५० लाखांची फसवणूक करणाऱ्या भामट्याविरोधात गावदेवी पोलिसांनी गुन्हा नोंदवला. प्रवीण राडे असे या भामट्याचे नाव आहे.
ज्या इमारतीत तक्रारदाराचे दुकान आहे, त्याच इमारतीत राडे वास्तव्यास होता. त्याच्याकडे अंबर दिवा असलेली इनोव्हा होती. उपसचिवाचा स्वीय सहाय्यक असून हे वाहन शासनाने कामानिमित्त फिरण्यासाठी दिल्याचे राडेने तक्रारदारास सांगितले होते. त्यावर दुकानदाराचा विश्वास बसला. गेल्यावर्षी मे महिन्यात अचानक राडेने त्याच्याकडे १० लाखांची मागणी केली. एका निविदा प्रक्रियेसाठी ही रक्कम हवी असून ती त्वरित परत करीन, शिवाय तुमचाही फायदा करून देईन, असे त्याने सांगितले. त्याच्यावर विश्वास ठेवून दुकानदाराने ती रक्कम राडेला देऊ केली.
पुढे त्यातील साडेतीन लाख राडेने टप्प्याटप्प्याने दिले. उर्वरित साडेसहा लाख रुपये देण्यास त्याने टाळाटाळ केली. तेव्हा दुकानदाराने मंत्रालयात संबंधित विभागात राडेचा फोटो दाखवून चौकशी केली असता अशा नावाची व्यक्ती इथे नियुक्त नसल्याची माहिती मिळताच दुकानदाराने गावदेवी पोलिस ठाणे गाठून फसवणुकीची तक्रार दिली.