हरयाणातील पाच तरुणांना शस्त्रसाठ्यासह अटक

हरियानातील पाच तरुणांना शस्त्रसाठ्यासह अटक

मुंबई, ता. ८ ः हरियाना राज्यातून मोठा शस्त्रसाठा घेऊन मुंबईत धडकलेल्या पाच तरुणांच्या टोळीला खंडणीविरोधी पथकाने मंगळवारी (ता. ५) कॉटन ग्रीन परिसरातून अटक केली. त्यांच्या ताब्यातून चार देशी कट्टे आणि ५१ जिवंत काडतुसे जप्त करण्यात आली. या आरोपींना १२ ऑगस्टपर्यंत पोलिस कोठडीत ठेवण्याचे आदेश दिले आहेत.
पाचही आरोपी हरियानाचे सराईत गुन्हेगार आहेत. चौकशीत हा शस्त्रसाठा विक्रीसाठी मुंबईत आल्याचे ते सांगत आहेत. त्यांच्या दाव्याची खातरजमा सुरू आहे. सोबत या शस्त्रसाठ्याचा वापर शहरात गंभीर गुन्ह्यांसाठी होणार होता का, ते पंजाब आणि हरियानातील कुख्यात लॉरेन्स बिश्नोई किंवा अन्य संघटित टोळ्यांशी संबंधित आहेत का, याबाबतही माहिती मिळवण्याची धडपड सुरू असल्याचे गुन्हे शाखेतील वरिष्ठ अधिकाऱ्याने सांगितले. मिळालेल्या माहितीनुसार, अटक करण्यात आलेल्या एका आरोपीच्या मोबाईलमध्ये गुन्हे शाखेला गँगस्टर गोल्डी ब्रारचे व्हिडिओ सापडले. याबाबत गुन्हे शाखेने अधिकृत माहिती दिलेली नसली तरी खंडणीविरोधी पथक हरियाना पोलिसांशी सतत संपर्कात असल्याचे समजते. सन्नी रमेशकुमार, रवी अंग्रेज, राहुल सिंह, अनुज कुमार, आदित्य कौशिक अशी या आरोपींची नावे आहेत.