कर्करोगग्रस्त पती, मुलीसाठी भाड्याने चालवली रिक्षा

कर्करोगग्रस्त पती, मुलीसाठी भाड्याने चालवली रिक्षा
रक्षाबंधनाच्या दिवशी रिक्षा मिळाली भेट
सकाळ वृत्तसेवा
मुंबई, ता. ९ : रिक्षाचालक पती कर्करोगाने ग्रासल्यानंतर पती आणि दोन मुलींसाठी सारिका मेस्त्री यांनी स्वतः रिक्षा चालवण्याचा निर्णय घेतला. त्या साडेचार महिन्यांपासून रिक्षाच्या माध्यमातून संसाराचा गाडा हाकत आहेत, मात्र त्यानंतर रक्षाबंधनाच्या दिवशी अनोखी भेट मिळाली, ती म्हणजे रिक्षा. समाजसेवक डॉ. अनील काशी मुरारका यांनी सारिका मेस्त्री यांना रिक्षा भेट दिली. मेस्त्री रक्षाबंधनाचा दिवस त्यांच्यासाठी अविस्मरणीय ठरला आहे.
सारिकाचे पती स्वतः रिक्षा चालवत होते, मात्र त्यांना कर्करोग असल्याचे समजले. त्यांच्यावर सध्या उपचार सुरू आहेत. पती आजारी असल्याने कुटुंबाचा उदरनिर्वाह आणि मुलींचे शिक्षण कसे करायचे, असा प्रश्न सारिका यांना होता, पण त्यांनी हार न मानता परिस्थितीला धैर्याने सामोरे जाण्याचा निर्णय घेतला. भाड्याने रिक्षा चालवण्यास सुरुवात केली, मात्र भाड्याच्या रिक्षाचे भाडे देऊन उरणारे पैसे कमी होते, परंतु त्यांनी कुटुंबाचा उदरनिर्वाह आणि मुलींचे शिक्षण करण्याचा प्रयत्न केला.
समाजसेवक डॉ. अनील काशी मुरारका हे ॲम्पल मिशनच्या माध्यमातून देशभरात विविध सामाजिक उपक्रम राबवित आहेत. त्यांना एका जवळच्या व्यक्तीकडून सारिका यांच्याबाबत समजले. त्यांनी सारिका यांना रिक्षा भेट देण्याचा निर्णय घेतला. सारिका यांनी डॉ. अनील काशी मुरारका यांना राखी बांधली. तसेच डॉ. अनील काशी मुरारकांसोबत नवीन रिक्षात पहिली फेरी मारली. डॉ. अनील काशी मुरारका म्‍हणाले, खरी जिद्द कशी असते, याचे उत्तम उदाहरण म्‍हणजे सारिका आहे. तिने सतत रिक्षाचे भाडे भरत राहू नये. तिला मिळणारे उत्पन्न तिच्या घरासाठी, मुलांसाठी, स्वतःसाठी राहावे, अशी माझी इच्छा होती, असे त्‍यांनी सांगितले.
मला काही कळतच नाही मी काय बोलू, रक्षाबंधनाच्या दिवशी माझ्या मोठ्या भावासारख्या अनीलजींनी हे गिफ्ट देऊन माझ्या आयुष्यातील सर्वात मोठं स्वप्न पूर्ण केलं आहे, अशा शब्‍दांत सारिका मेस्‍त्री यांनी भावना व्यक्‍त केल्‍या.