अकरावीच्या व्यवस्थापन कोट्यासाठी पुन्हा मुदतवाढ

अकरावीच्या व्यवस्थापन कोट्यासाठी पुन्हा मुदतवाढ
मुंबई, ता. ९ : अकरावीच्या ऑनलाइन प्रवेश प्रक्रियेत शिक्षण संस्थाचालकांच्या व्यवस्थापन कोट्यातील जागा भरण्यासाठी शिक्षण विभागाने पुन्हा एकदा मुदतवाढ दिली आहे. आता संस्थांना ११ ऑगस्टपर्यंत या जागा भरता येणार आहेत. शिक्षण विभागाच्या या निर्णयावर सिस्कॉम संस्थेने आक्षेप घेतला आहे.
सिस्कॉमच्या मते, ६ मे रोजीच्या जीआरनुसार तिसऱ्या फेरीनंतर व्यवस्थापन कोट्याच्या जागा कॅप फेरीसाठी समर्पित करणे आवश्यक होते; मात्र शिक्षण विभागाने हा नियम पाळला नाही आणि चौथ्या फेरीनंतरही या जागा समर्पित केल्या नाहीत. त्यानंतर ‘ओपन टू ऑल’ फेरीतही या जागा भरण्याची बेकायदेशीर मुभा देण्यात आली. आता पुन्हा मुदतवाढ दिल्याने, राखीव जागा खुल्या प्रवर्गात वर्ग केल्या जात असताना व्यवस्थापन कोट्याच्या जागा संस्थांसाठी खुल्या का ठेवल्या जात आहेत, असा प्रश्न सिस्कॉमने उपस्थित केला आहे.
दरम्यान, ओपन टू ऑल अकरावी प्रवेश फेरीमध्ये ८ ऑगस्टला एकूण ३,१५,३११ विद्यार्थ्यांनी कनिष्ठ महाविद्यालयात प्रत्यक्ष प्रवेश निश्चित केलेले आहेत. त्यामध्ये कॅप फेरीसाठी एकूण ३,१०,७०८ इतके प्रवेश झालेले आहेत. तसेच विविध प्रकारच्या व्यवस्थापन कोट्यामध्ये ४,६०३ विद्यार्थ्यांचे प्रवेश निश्चित झाले असल्याची माहिती शिक्षण संचालक महेश पालकर यांनी दिली.