प्रेमभंगाने दुःखी तरुणांची फसवणूक

प्रेमभंगाने दुःखी तरुणांची फसवणूक
पाक सीमेवरील राजस्थानच्या गंगानगर गावात गुन्हे शाखेकडून टोळी अटकेत
मुंबई, ता. ९ : प्रेमभंगाने दुखावलेल्या तरुणांना इन्स्टाग्रामवर जाळ्यात ओढून फसवणाऱ्या एका मोठ्या टोळीला मुंबई गुन्हे शाखेने पकडले आहे. ही कारवाई राजस्थानमधील श्री गंगानगर शहरात, पाकिस्तानच्या सीमेजवळ करण्यात आली.
या टोळीने ‘लॉस्ट लव्ह बॅक’ आणि ‘खोया हुआ प्यार पाये २४ घंटो मे’ अशा जाहिराती इन्स्टाग्रामवर दिल्या होत्या. दक्षिण मुंबईतील एका १८ वर्षांच्या तरुणीने अशाच एका जाहिरातीला लाइक केले. त्यानंतर एका व्यक्तीने मौलवी बनून तिच्याशी संपर्क साधला आणि तिचे प्रेम परत मिळवून देण्याच्या नावाखाली काही विधी करायला सांगितले. या विधीसाठी सोने, चांदी आणि रोख रक्कम लागेल, असे त्याने सांगितले.
या तरुणीने शुक्रवारी (ता. १) त्या व्यक्तीला घरात बोलावून १३ तोळे सोन्याचे दागिने आणि तीन लाख रुपये दिले. घरच्यांना कळू नये म्हणून तिने चोरीचा बनाव केला; पण पोलिसांनी केलेल्या चौकशीत तिने घडलेला प्रकार सांगितला.
गुन्हे शाखेच्या तपासामध्ये आरोपी राजस्थानमधील श्री गंगानगर शहरात असल्याचे निष्पन्न झाले. पोलिसांनी विकास मेघवाल आणि मनोज नागपाल या दोघांना अटक करून त्यांच्याकडून १६.१८ लाख रुपयांचा मुद्देमाल जप्त केला. या टोळीने महाराष्ट्र, दिल्ली, हरियाना अशा अनेक राज्यांतील तरुणांची फसवणूक केल्याचे समोर आले आहे.