अंगारक संकष्टी चतुर्थीनिमित्त वाहतुकीत बदल

अंगारक संकष्टी चतुर्थीनिमित्त वाहतुकीत बदल
सिद्धिविनायक न्यासची चोख व्यवस्था
सकाळ वृत्तसेवा
मुंबई, ता. १० : अंगारक संकष्टी चतुर्थीनिमित्त मंगळवारी (ता. १२) वाहतुकीत बदल करण्यात आले आहेत. भाविकांना व्यवस्थित दर्शन घेता यावे, यासाठी प्रभादेवी येथील श्री सिद्धिविनायक न्यासच्या वतीने चोख व्यवस्था करण्यात आली आहे.
पोलिसांनी सांगितले की अंगारकीनिमित्त सिद्धिविनायक मंदिरात मोठ्या प्रमाणात भाविकांची गर्दी होते. त्यामुळे आजूबाजूच्या परिसरात वाहतूक कोंडी होण्याची शक्यता असते. वाहतूक कोंडी टाळण्यासाठी सिद्धिविनायक मंदिराच्या आसपासच्या परिसरात मंगळवारी तात्पुरत्या स्वरूपात वाहतूक बदल करण्यात आले आहेत.
वाहतूक कोंडी टाळण्यासाठी मंगळवारी सकाळी सहा ते मध्यरात्रीपर्यंत वाहतूक बदल करण्यात येणार आहे. अनेक महत्त्वाचे रस्ते पूर्णपणे बंद ठेवण्यात येणार आहेत. गैरसोय टाळण्यासाठी पर्यायी मार्गांचा वापर करावा, वाहतूक संकेतांचे पालन करावे आणि कर्तव्यावरील वाहतूक कर्मचाऱ्यांच्या सूचनांचे पालन करण्याचे पोलिसांनी आवाहन केले आहे.

या मार्गावरील वाहतूक प्रभावित होणार
एस. व्ही. एस. रोड, एस. के. बोले रोड, गोखले रोड (दक्षिण आणि उत्तर), काकासाहेब गाडगीळ मार्ग, सयानी रोड, आप्पासाहेब मराठे मार्ग

रस्ते बंद आणि निर्बंध
- गोखले रोड आणि आगर बाजार जंक्शनवरून एस. के. बोले रोडवर वाहनांना प्रवेश दिला जाणार नाही.
- गोखले रोडवरून दत्ता राऊळ रोड आणि एन. एम. काळे रोडवर वाहनांना प्रवेश नसेल.
- सिद्धिविनायक मंदिर जंक्शनपासून एस. के. बोले रोडपर्यंत एसव्हीएस रोड वाहनांच्या वाहतुकीसाठी पूर्णपणे बंद असेल.
- सायनी रोडवरील लेनिनग्राड चौकातून शंकर घाणेकर मार्गाकडे जाणारे उजवे वळण बंद असेल.
- रवींद्रनाथ नाट्य मंदिरापासून डावे वळणदेखील बंद राहील.

सहा ते सात लाख भाविक येण्याची शक्यता
प्रभादेवी, ता. ७ (बातमीदार ) : प्रभादेवी येथील सिद्धिविनायक मंदिरात मंगळवारी अंगारक संकष्टी चतुर्थीनिमित्त दर्शन घेण्यासाठी सहा ते सात लाख भाविक येण्याची शक्यता सिद्धिविनायक न्यासने व्यक्‍त केली आहे. पुरुष महिला यांच्यासाठी स्वतंत्र रांगा करण्यात आल्या असून अपंग व्यक्ती, गरोदर स्त्रिया, सेवेकरी, ज्येष्ठ नागरिक, नवजात बालकासह मात-पित्यांना दर्शनासाठी स्वतंत्र व्यवस्था करण्यात आली आहे. सोमवार मध्यरात्री १.३० ते पहाटे ३.१५ वाजेपर्यंत, पहाटे ३.५० ते रात्री ९ वाजेपर्यंत, रात्री ९.३० ते रात्री ११.५० वाजेपर्यंत भाविकांना दर्शन घेता येईल.