जादा शुल्क घेणाऱ्यांवर परिवहनचे लक्ष

जादा शुल्क घेणाऱ्या वितरकांवर लक्ष
परिवहन विभागाचा आदेश

सकाळ वृत्तसेवा
मुंबई, ता. १० : वाहनविक्री करताना वितरक हँडलिंग चार्जेस म्हणून ग्राहकांकडून अतिरिक्त रक्कम वसूल करीत असल्याच्या तक्रारी दिवसेंदिवस वाढत आहेत. आपल्या विभागातील वितरकांनी विक्री केलेल्या १०० वाहनांची तपासणी करून दोषी वितरकांवर मोटार वाहन कायद्यानुसार कारवाई करावी, असे आदेश परिवहन आयुक्त कार्यालयाने राज्यातील प्रादेशिक परिवहन अधिकारी आणि उप प्रादेशिक परिवहन अधिकारी यांना दिले आहेत.
वाहनांच्या नोंदणीसाठी ग्राहकांकडून विहित शुल्काव्यतिरिक्त कोणतेही जादा शुल्क आकारण्यात येऊ नये, असे परिपत्रकानुसार शासनाकडून सूचना प्राप्त झालेल्या आहेत. त्यानुसार वाहनांच्या नोंदणीसाठी ग्राहकांकडून शुल्क आकारताना या सूचनांचे काटेकोरपणे अंमलबजावणी करण्याचे आवाहन करण्यात आले आहे अन्यथा संबंधितांविरुद्ध मोटार वाहन कायद्यानुसार कारवाई करण्यात येणार आहे. नवीन दुचाकी चारचाकी वाहनांकरिता शासनाने वेळोवेळी विहित केलेले नोंदणी शुल्क व कर याव्यतिरिक्त कोणत्याही प्रकारचे अतिरिक्त शुल्क आकारण्यात येऊ नये. तसेच वाहन नोंदणीसाठी शासनाने वेळोवेळी विहित केलेले नोंदणी शुल्क व कर याबाबतची माहिती प्रत्येक वितरकाने शोरूममधील दर्शनी भागामध्ये प्रदर्शित करणे आवश्यक आहे.
...
काय आहे आदेश?
आपल्या कार्यक्षेत्रातील वाहन वितरकांनी विक्री केलेल्या १०० वाहनांची तपासणी करण्यात यावी. वाहन वितरकांनी ठरवून दिलेल्या रकमेपेक्षा अधिक रक्कम किंवा जास्त आरटीओ शुल्क आकारात असल्यास दोषी वाहन वितरकांवर मोटार वाहन कायदा व त्यातील नियमानुसार योग्य ती कारवाई करण्यात यावी. परिवहन विभागात याबाबतचा अहवाल तत्काळ सादर करण्यात यावा, असे आदेश देण्यात आले आहेत.