अल्पवयीन मुलीवर सामूहिक अत्याचार

अल्पवयीन मुलीवर
सामूहिक अत्याचार

पाच अल्पवयीनांसह सहा जणांवर कारवाई

मुंबई : मध्य मुंबईत अल्पवयीन तरुणीवर सामूहिक बलात्कार करण्यात आला. या कृतीचे चित्रीकरण करण्यात आले. त्याआधारे पुढील काही महिने या तरुणीचा लैंगिक छळ सुरू झाला, अशी धक्कादायक माहिती पुढे आली आहे.

गेल्या वर्षी ऑक्टोबरपासून पीडितेवर सुरू असलेल्या लैंगिक अत्याचारांना गेल्या आठवड्यात शनिवारी अपघाताने वाचा फुटली आणि पीडितेच्या पालकांनी पोलिस ठाण्यात धाव घेतली. सामूहिक बालात्कारासह पोक्सोतील विविध कलमानुसार स्थानिक पोलिसांनी गुन्हा नोंदवला. पोलिसांनी लगोलग या गुन्ह्यात सहभागी असलेल्या एक प्रौढ आणि पाच अल्पवयीन आरोपींना ताब्यात घेतले आणि डोंगरी येथील बालसुधारगृहात धाडले, तर प्रौढ आरोपीस अटक केली.

पोलिसांनी दिलेल्या माहितीनुसार, यातील एका अल्पवयीन आरोपीने पीडित तरुणीशी मैत्री वाढवली. घटना घडली त्या दिवशी या आरोपीने पीडितेस अन्य आरोपीच्या(प्रौढ आरोपी) घरी नेले. तेथे या दोघांनी पीडितेवर सामूहिक अत्याचार केले. या प्रसंगाचे चित्रीकरण करून ते व्हायरल करण्याची धमकी देत या दोघांसह अन्य चार अल्पवयीन आरोपींनी पीडितेवर नियमित अत्याचार केले आहेत.

दरम्यान, पीडितेसोबत प्रेमसंबंध असल्याचा संशय अल्पवयीन आरोपीच्या प्रेयसीला होता. गेल्या आठवड्यात शनिवारी तिने पीडितेचे घर गाठले आणि पालकांसमोरच तिला याबाबत जाब विचारला. पालकांनी जेव्हा आपल्या मुलीचा मोबाइल तपासला तेव्हा त्यात नको त्या अवस्थेतील छायाचित्रे आणि व्हिडिओ आढळले. त्यानंतर पीडितेने गेल्यावरही ऑक्टोबरपासून घडला प्रकार पालकांना आणि नंतर तक्रारीच्या स्वरूपात पोलिसांना सांगितला.