राजस्थानचे गंगानगर नवे जमतारा

राजस्थानचे गंगानगर नवे जमतारा
गुन्हे शाखेच्या कारवाईतून उघड

मुंबई, ता. ११ : मुंबई गुन्हे शाखेने गेल्या आठवड्यात अटक केलेल्या आरोपींच्या चौकशीतून झारखंडच्या जमताराप्रमाणे सायबर भामट्यांचे प्रमुख केंद्र असलेल्या राजस्थानमधील श्री गंगानगरबाबत धक्कादायक माहिती पुढे आली. भारत-पाकिस्तान सीमेवरील या गावात नाना तऱ्हेने प्रत्येक वयोगटातील व्यक्तीला जाळ्यात ओढण्यासाठी समाजमाध्यमांवरील पोस्ट, फसवी ॲप, वेब पेज, वेबसाईट तयार केली जातात आणि ती विकलीही जातात.
दक्षिण मुंबईतील एका अल्पवयीन तरुणीचा प्रेमभंग झाला होता. ती उदास होती. अशात इन्स्टाग्रामवरील ‘खोया हुआ प्यार पाये २४ घंटो मे’ असा मजकूर लिहिलेली पोस्ट पाहण्यात आली. ती क्लिक करताच तिला एका व्यक्तीने मौलाना असल्याचे भासवून संपर्क साधला. काही विधी करावे लागतील. त्यानंतर अवघ्या काही तासांत तुझी अडचण दूर होईल, या थापेवर तरुणीने विश्वास ठेवला आणि घरातील तब्बल १६ लाखांचे दागिने, रोख रक्कम या व्यक्तीला देऊन बसली.

या प्रकरणाचा तपास करणाऱ्या गुन्हे शाखेच्या अधिकाऱ्यांनी दोन आरोपींना राजस्थानच्या गंगानगर शहरातून अटक केली. तेथील वास्तव्यात आणि अटक आरोपीच्या चौकशीतून गुन्हे शाखेच्या अधिकाऱ्यांना गंगानगर येथील सायबर फसवणुकीसाठी आवश्यक, कल्पनेपासून साधन सामग्रीपर्यंतची बाजारपेठ आढळली. या बाजारपेठेत हार्ट ब्रेक, लोन, बँक, क्रिप्टो करन्सी, बार, बिअर आदी विविध शब्द गुगल किंवा इन्स्टाग्रामवर टाइप केल्यास पहिल्या पाचात आपली फसवी जाहिरात किंवा पेज दिसावे, ही या बाजारपेठेत विक्रीस ठेवलेली अनोखी यंत्रणा गुन्हे शाखेच्या अधिकाऱ्यांना आढळली.