गाझातील नरसंहाराविरुद्ध निदर्शनास परवानगी देता येईल?

गाझातील नरसंहाराविरुद्ध
निदर्शनास परवानगी देता येईल?
माकपच्या याचिकेवर न्यायालयाची सरकारला विचारणा
सकाळ वृत्तसेवा
मुंबई, ता. ११ ः गाझातील नरसंहाराच्या निषेधार्थ आझाद मैदान येथे निदर्शने करण्यास परवानगी नाकारणाऱ्या मुंबई पोलिसांच्या निर्णयाविरुद्ध मार्क्सवादी कम्युनिस्ट पक्षाने (माकप) सोमवारी उच्च न्यायालयात धाव घेतली. न्यायालयाने माकपला आझाद मैदानात निदर्शने करण्यास परवानगी दिली जाऊ शकते का, अशी विचारणा करून राज्य सरकारला मंगळवारी भूमिका स्पष्ट करण्याचे आदेश दिले.
गाझा येथील नरसंहाराविरुद्ध करण्यात येणारी निदर्शने ही देशाच्या परराष्ट्र धोरणाविरुद्ध आहे. अशा निदर्शनामुळे कायदा आणि सुव्यवस्थेचा प्रश्न निर्माण होऊ शकतो, या कारणास्तव पोलिसांनी माकपला निदर्शनास परवानगी नाकारली. तथापि, निदर्शने परराष्ट्र धोरणाविरुद्ध असली, तरी नागरिकांना निदर्शने करण्याचा अधिकार आहे. त्याचप्रमाणे, कायदा आणि सुव्यवस्थेची परिस्थिती निर्माण होण्याची शक्यता हा अधिकार नाकारण्याचे कारण असू शकत नाही, असा दावा माकपने याचिकेत केला. न्या. रवींद्र घुगे आणि न्या. गौतम अनखड यांच्या खंडपीठाने याचिकाकर्त्यांना आझाद मैदान येथे निदर्शने करण्यास परवानगी दिली जाऊ शकते का, याबाबत भूमिका स्पष्ट करण्याचे आदेश सरकारला दिले.