कबुतरखाना मोर्चावरून एकीकरण समितीला नोटीस

कबुतरखाना मोर्चावरून एकीकरण समितीला नोटीस

मुंबई, ता. १२ ः शहरात पोलिस आयुक्तांचे जमावबंदी आदेश लागू आहेत. त्याचे उल्लंघन करणारा मोर्चा काढू नये. या आदेशाचे उल्लंघन करून मोर्चा काढला आणि त्यातून अनुचित घटना किंवा कायदा-सुव्यवस्थेचा प्रश्न निर्माण झाला तर त्यास सर्वस्वी जबाबदार धरले जाईल, अशी सूचना देणारी नोटीस मंगळवारी दादर पोलिसांनी मराठी एकीकरण समितीच्या प्रमुख पदाधिकाऱ्यांना बजावली आहे.
उच्च न्यायालयाच्या आदेशानुसार महापालिकेने बंद केलेला दादर येथील कबुतरखाना अवैधरीत्या खुला करणारे जैन धर्मीय आणि न्यायालय, पालिकेच्या निर्णयाचा विरोध करणाऱ्या पक्षिप्रेमींविरोधात मराठी एकीकरण समितीने बुधवारी सकाळी १० वाजता दादर येथे मोर्चा आयोजित केला आहे. समितीचे अध्यक्ष गोवर्धन देशमुख यांनी या मोर्चात अधिकाधिक महाराष्ट्र निष्ठावंतांनी सहभागी होऊन आपले अस्तित्व दाखवून द्या, असे आवाहन केले आहे. हे आवाहन समितीच्या पदाधिकाऱ्यांनी समाजमाध्यमांवरून सर्वदूर पसरविले आहे. त्या पार्श्वभूमीवर दादर पोलिस ठाण्याचे वरिष्ठ निरीक्षक ज्ञानेश्वर आवारी यांनी भारतीय नागरिक सुरक्षा संहितेतील (पूर्वीचा फौजदारी दंडसंहिता) कलम १६८नुसार ही नोटीस जारी केली आहे. मोर्चादरम्यान अनुचित घटना किंवा कायदा-सुव्यवस्थेचा प्रश्न निर्माण झाल्यास कायदेशीर कारवाई केली जाईल आणि ही नोटीस पुरावा म्हणून ग्राह्य धरली जाईल, असे वरिष्ठ निरीक्षक आवारी यांनी नमूद केले आहे.