अवयव प्रत्यारोपण समितीची पुनर्स्थापना

अवयव प्रत्यारोपण
समितीची पुनर्स्थापना

आरोग्य विभागाचा नवा शासन निर्णय जाहीर

सकाळ वृत्तसेवा
मुंबई, ता. १३ : राज्यातील अवयव प्रत्यारोपण प्रक्रियेला गती देण्यासाठी आणि आवश्यक मार्गदर्शनासाठी राज्य सहाय्यक समितीची पुनर्स्थापना करण्यात आली आहे. सार्वजनिक आरोग्य विभागाने याबाबतचा शासन निर्णय काढला आहे. नव्या समितीत एकूण १६ सदस्यांचा समावेश आहे.
सार्वजनिक आरोग्य विभागाचे सचिव समितीचे अध्यक्ष असतील, तर केईएम रुग्णालयातील प्राध्यापक व मूत्रपिंड विभागप्रमुख डॉ. सुजाता पटवर्धन, केईएम रुग्णालयातील गॅस्ट्रोएंटरोलॉजी विभागाचे विभागप्रमुख डॉ. आकाश शुक्ला, छत्रपती संभाजीनगर येथील वैद्यकीय महाविद्यालयाचे मूत्रविकार विभागाचे प्रमुख व्यंकट गीते अशा १६ सदस्यांची ही समिती आहे. या समितीत वैद्यकीय शिक्षण क्षेत्रातील तज्ज्ञ, प्रमुख शासकीय अधिकारी, कायदा व न्याय विभागाचे प्रतिनिधी तसेच अवयवदान आणि प्रत्यारोपण क्षेत्रातील अनुभवी व्यक्तींचा समावेश आहे.