एका प्रभागात एकच उमेदवार हवा!

एका प्रभागात एकच
उमेदवार हवा!

महापालिका निवडणुकीबाबत मनसेची मागणी

मुंबई, ता. १३ : महाराष्ट्र नवनिर्माण सेनेने राज्यातील आगामी महापालिका निवडणुका प्रभाग पद्धतीऐवजी ‘एक प्रभाग – एक उमेदवार’ या पद्धतीने घेण्याची मागणी केली आहे. यासाठी त्यांनी राज्याचे निवडणूक आयुक्त दिनेश वाघमारे यांची भेट घेतली. मनसे नेते बाळा नांदगावकर, शिरीष सावंत, संदीप देशपांडे यांच्या नेतृत्वाखाली यासाठी प्रयत्न केले जात आहेत.

मनसे नेते शिरीष सावंत यांनी सांगितले की, ठाणे, पुणे, कल्याण-डोंबिवली, नाशिक अशा शहरांत लोकसंख्या प्रचंड वाढली आहे. एका प्रभागाची लोकसंख्या निम्म्या विधानसभेच्या आकाराची असते. अशा वेळी वेगवेगळ्या पक्षांचे अनेक नगरसेवक निवडून आले की, नागरिकांना कोणत्या कामासाठी कोणाकडे जायचे हेच समजत नाही. त्यामुळे एक प्रभाग-एक उमेदवार पद्धत लागू व्हावी, अशी मनसेची मागणी आहे.
सावंत यांनी सांगितले की, निवडणूक आयोगाच्या मते एका प्रभागात अनेक उमेदवार असल्यास व्हीव्हीपॅट यंत्रणा वापरणे कठीण आहे. ‘एक प्रभाग - एक उमेदवार’ पद्धत लागू झाल्यास हा प्रश्न उरणार नाही. मतदार यादीतील दुबार नोंदणी रोखण्यासाठी राज्य निवडणूक आयोगाने विशेष पुनर्निरीक्षण मोहीम तत्काळ राबवावी, अशीही मागणी मनसेने केली आहे.
............