अन्न व औषध प्रशासनाची विशेष तपासणी माेहीम

अन्न व औषध प्रशासनाची
विशेष तपासणी माेहीम

सणासुदीच्या पार्श्वभूमीवर अन्न व्यावसायिकांना प्रशिक्षण

सकाळ वृत्तसेवा
मुंबई, ता. १३ : राज्यातील नागरिकांना सकस व निर्भेळ अन्नपदार्थ उपलब्ध करून देण्यासाठी अन्न व औषध प्रशासनातर्फे ‘सणासुदीचे विशेष तपासणी अभियान’ सुरू करण्यात आले आहे. विभागाचे सचिव धीरज कुमार यांच्या हस्ते यशवंतराव चव्हाण सेंटर येथे या अभियानाचा प्रारंभ झाला. या अभियानांतर्गत अन्न व्यावसायिकांसाठी प्रशिक्षण देण्यात आले. २५ ऑक्टोबरपर्यंत ही माेहीम राबवण्यात येणार आहे.
अन्न व औषध प्रशासन विभागाचे आयुक्त राजेश नार्वेकर म्हणाले, की सणासुदीच्या कालावधीत बाजारात मागणीपेक्षा पुरवठा कमी होतो तेव्हा भेसळीचे प्रकार आढळून येतात. प्रशिक्षणामुळे अन्न व्यावसायिक नियमांचे याेग्य प्रकारे पालन करतील. या वेळी खाद्यान्न विक्रेत्यांच्या (फेरीवाला) प्रतिकृतीचे सचिव धीरज कुमार यांच्या हस्ते अनावरण करण्यात आले. या वेळी नागरिकांनी अन्नपदार्थांच्या गुणवत्ता व दर्जाबाबत तक्रारी असल्यास १८००-२२२-३६५ या टोल-फ्री क्रमांकावर कळवाव्यात, असे आवाहनही करण्यात आले.