ॲड. आरती साठे यांची अखेर न्यायमूर्तीपदी नियुक्ती

ॲड. आरती साठे यांची
अखेर न्यायमूर्तिपदी नियुक्ती
सकाळ वृत्तसेवा
मुंबई, ता. १३ ः भाजपच्या माजी प्रदेश प्रवक्त्या ॲड. आरती साठे यांच्यासह ज्येष्ठ वकील सुशील मनोहर घोडेस्वार आणि अजित कडेठाणकर या तिघांची उच्च न्यायालयाच्या अतिरिक्त न्यायमूर्तिपदी नियुक्ती करण्यात आली आहे. केंद्रीय कायदा आणि न्याय राज्यमंत्री (स्वतंत्र प्रभार) अर्जुन राम मेघवाल यांनी ‘एक्स’ पोस्ट करून ही माहिती दिली.
सरन्यायाधीश भूषण गवई यांच्या अध्यक्षतेखालील सर्वोच्च न्यायालयाच्या न्यायवृंदाने २८ जुलै रोजी मंजुरीसाठी केंद्र सरकारकडे पाठविला होता. त्यास केंद्राकडून मान्यता मिळाली आहे. या निर्णयामुळे उच्च न्यायालयातील न्यायमूर्तींच्या संख्येत वाढ होणार असून, १ ऑगस्टपर्यंत ही संख्या ६६ इतकी होती. उच्च न्यायालयातील मंजूर न्यायमूर्तींची मंजूर संख्या ९४ आहे.
तत्पूर्वी, साठे या दोन वर्षांपूर्वी भाजपच्या प्रवक्त्या व मुंबई भाजपच्या विधी विभागाच्या प्रमुख होत्या. साठे यांच्याकडून निष्पक्ष न्यायदानाची कशी अपेक्षा करणार, असा सवाल करीत काँग्रेस आणि राष्ट्रवादी काँग्रेसने आक्षेप घेतला होता. साठे यांनी ६ जानेवारी २०२४ रोजी प्रवक्तेपदाचा व विधी विभागप्रमुखपदाचा राजीनामा दिल्याचे स्पष्टीकरण भाजपकडून देण्यात आले होते. आरती साठे या कर विवाद, सेबी प्रकरणे आणि वैवाहिक वादाशी संबंधित प्रकरणे प्रामुख्याने हाताळत होत्या.
साठे यांचे वडील अरुण साठे आणि आई क्रांती साठे हेही वकील आहेत. आई क्रांती साठे या कौटुंबिक न्यायालयातील प्रसिद्ध वकील असून, खार-वांद्रे येथील भाजप नगरसेविका होत्या.