वसई-विरारचे माजी आयुक्त अनिलकुमार पवार यांना अटक

वसई-विरारचे माजी आयुक्त
अनिलकुमार पवार यांना अटक
माजी नगररचना उपसंचालकांसह चौघे ताब्यात
मुंबई, ता. १३ ः अनधिकृत बांधकाम गैरव्यवहारप्रकरणी वसई-विरार महापालिकेचे माजी आयुक्त अनिलकुमार पवार यांच्यासह तत्कालीन नगररचना उपसंचालक वाय. एस. रेड्डी, बांधकाम व्यावसायिक तथा बहुजन विकास आघाडीचे माजी नगरसेवक सीताराम गुप्ता आणि त्यांचा मुलगा अरुण गुप्ता यांना सक्तवसुली संचालनालयाने (ईडी) बुधवारी अटक केली.
वसईच्या अचोळे गावातील सांडपाणी प्रक्रिया प्रकल्प आणि क्षेपणभूमीसाठी आरक्षित भूखंड खासगी विकसकांना अवैध बांधकामासाठी देण्यासह या प्रक्रियेत कोट्यवधींचा आर्थिक गैरव्यवहार केल्याप्रकरणी ईडीने ही कारवाई केली. या आरक्षित भूखंडासह शेजारची खासगी जागा बनावट कागदपत्रे, नोंदी तयार करून विकसकांना मिळवून देण्यात गुप्ता पितापुत्रांचा सहभाग होता. या भूखंडांवर ४१ बहुमजली इमारती उभ्या राहिल्या. त्या उभारणाऱ्या विकसकांनाही यातील एक भूखंड शासकीय प्रकल्पांसाठी आरक्षित असल्याची जाणीव होती; मात्र इमारती उभ्या करून त्यातील सदनिका आणि व्यावसायिक गाळ्यांची विकसकांना विक्री केली. त्याविरोधात मिरा-भाईंदर-वसई-विरार पोलिस आयुक्तालयात अनेक तक्रारी दाखल झाल्या होत्या. तसेच उच्च न्यायालयात याचिकाही दाखल झाल्या होत्या. न्यायालयाने या ४१ इमारती जमीनदोस्त करण्याचे आदेश दिले. त्यामुळे सुमारे तीन हजार कुटुंबे बेघर झाली.
---
तीन महिन्यांपासून कारवाई!
१. पोलिस आयुक्तालयात नोंदवलेल्या गुन्ह्याचा आधार घेत ईडीने समांतर तपास सुरू केला होता. मे महिन्यापासून तीन टप्प्यांत पवार, रेड्डी, गुप्ता, विकसकांसह संबंधितांच्या निवासस्थानी, कार्यालयांवर छापे घातले.
२. वसई-विरारसह मुंबई, नाशिक, हैदराबाद येथील ठिकाणांचा समावेश होता. अखेरचा छापा पवार यांनी आयुक्तपदाचा पदभार सोडताच दुसऱ्या दिवशी त्यांच्या निवासस्थानी पडला. त्यानंतर ईडीने पवार यांची अनेक तास कसून चौकशी केली.
३. प्रकरणाच्या परवानग्या किंवा नोंदीतील कथित बदल मी आयुक्तपदाचा पदभार स्वीकारण्यापूर्वीचे आहे. आपला या प्रकरणाशी संबंध नाही, अशी प्रतिक्रिया पवार यांनी माध्यमांना दिली होती.