रेल्वे पार्सल बुकिंगमधून तंबाखूची तस्करी उघड

रेल्वे पार्सल बुकिंगमधून तंबाखूची तस्करी उघड
सकाळ वृत्तसेवा
मुंबई, ता. १४ : मध्य रेल्वेच्या सतर्कता पथकाने पार्सल बुकिंग प्रणालीचा गैरवापर करून होणाऱ्या बेकायदा तंबाखू उत्पादनांच्या वाहतुकीचा पर्दाफाश केला. मिळालेल्या माहितीच्या आधारे करण्यात आलेल्या या कारवाईत तब्बल सहा लाख रुपये किमतीचा सुगंधित तंबाखू, पानमसाला आणि इतर बेकायदा वस्तू जप्त करण्यात आल्या.
मिळालेल्या माहितीनुसार, १३ ऑगस्ट रोजी गाडी क्रमांक ११०५६ गोंडा-लोकमान्य टिळक टर्मिनस (एलटीटी) गोदान एक्स्प्रेस येथील पार्सलचे लक्षपूर्वक निरीक्षण करण्यात आले. गाडी एलटीटी स्थानकावर येण्याआधीच सतर्कता पथक आणि रेल्वे सुरक्षा बल (आरपीएफ) कर्मचारी तेथे पोहोचले. गोंडाहून आलेल्या एका संशयित पार्सल खेपावर लक्ष केंद्रित करीत मुख्य पार्सल निरीक्षक आणि आरपीएफच्या उपस्थितीत १० पॅकेट्स उघडण्यात आले. तपासात या १० पॅकेट्सचे वजन तब्बल ५६४ किलो निघाले. यामध्ये सुगंधित तंबाखू आणि पानमसाल्याचा मोठ्या प्रमाणात साठा सापडला. हा सर्व मुद्देमाल जप्त करून पुढील कारवाईसाठी आरपीएफकडे सुपूर्द करण्यात आला.