डॉ. होमी भाभा स्टेट युनिव्हर्सिटीतर्फे देशभक्तीपर रॅली

डॉ. होमी भाभा स्टेट युनिव्हर्सिटीतर्फे देशभक्तीपर रॅली

मुंबई, ता. १५ ः ‘हर घर तिरंगा’ या राष्ट्रीय उपक्रमाच्या निमित्ताने डॉ. होमी भाभा स्टेट युनिव्हर्सिटी, मुंबईतर्फे गुरुवारी (ता. १४) भव्य देशभक्तीपर रॅलीचे आयोजन करण्यात आले. पावसातही तिरंग्याच्या रंगात न्हालेल्या या रॅलीत सुमारे ८०० विद्यार्थ्यांनी उत्स्फूर्त सहभाग नोंदवला.
विद्यापीठाचे कुलगुरू डॉ. रजनीश कामत यांच्या नेतृत्वाखाली रॅली पार पडली. याप्रसंगी डॉ. श्रीनिवास कुलकर्णी, डॉ. सौमित्र सावंत, डॉ. विशाल बनेवार आणि डॉ. पराग मशाराम यांची विशेष उपस्थिती होती. रॅलीची सुरुवात विद्यापीठाच्या मुख्य इमारतीपासून झाली. विद्यार्थ्यांनी हातात तिरंगा घेऊन ‘भारत माता की जय’, ‘वंदे मातरम’ आणि ‘जय हिंद’ अशा घोषणांचा जयघोष करीत मार्गक्रमण केले. पावसाच्या सरींची पर्वा न करता देशभक्तीचा संदेश पोहोचवण्याच्या निर्धाराने विद्यार्थी उत्साहात सहभागी झाले. मार्गावरील नागरिकांनी टाळ्यांच्या गजरात आणि तिरंगा फडकवून रॅलीला दाद दिली. या रॅलीचे उद्दिष्ट ‘हर घर तिरंगा’ उपक्रमाचा संदेश समाजाच्या प्रत्येक स्तरापर्यंत पोहोचवणे, राष्ट्रीय ऐक्य दृढ करणे आणि तरुण पिढीत देशभक्तीची भावना रुजवणे हे होते. विद्यार्थ्यांनी तिरंग्याच्या प्रतीकात्मक महत्त्वावर आधारित आकर्षक पोस्टर्स आणि फलक प्रदर्शित केले. कुलगुरू डॉ. रजनीश कामत यांनी विद्यार्थ्यांना उद्देशून म्हटले, की तिरंगा हा आपल्या स्वातंत्र्याचा, त्यागाचा आणि ऐक्याचा सजीव प्रतीक आहे. प्रत्येक भारतीयाने तो अभिमानाने फडकवणे ही देशसेवेची खरी भावना आहे. तरुणाईने हा संदेश समाजाच्या प्रत्येक कोपऱ्यात पोहोचवणे आवश्यक आहे. रॅलीचा समारोप विद्यापीठ प्रांगणात सामूहिक राष्ट्रगीताने झाला.