गणेशोत्सव आता राज्य महोत्सव

गणेशोत्सव आता राज्य महोत्सव
ॲड. आशीष शेलार; ११ कोटींची तरतूद
सकाळ वृत्तसेवा
मुंबई, ता. १४ : यंदाचा गणेशोत्सव प्रथमच राज्य महोत्सव म्हणून साजरा करण्याची घोषणा सांस्कृतिक कार्यमंत्री ॲड. आशीष शेलार यांनी केली असून, यासाठी शासनाने ११ कोटी रुपयांचा निधी मंजूर केला आहे. आज याबाबत शासन निर्णय जारी झाला.
उत्सवाची माहिती देशभर व आंतरराष्ट्रीय पातळीवर पोहोचवण्यासाठी माध्यमांतून प्रचार केला जाणार असून, पर्यटकांसाठी विशेष सुविधा व वाहनव्यवस्था उपलब्ध होईल. गणेशोत्सवाची ओळख जागतिक पातळीवर ठळक करण्याचा आमचा प्रयत्न आहे, असे शेलार यांनी सांगितले.
मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांच्या नेतृत्वाखाली हा महोत्सव भव्य स्वरूपात होणार आहे. गिरगाव चौपाटीवर ड्रोन शो, राज्यभर सांस्कृतिक कार्यक्रम, व्याख्यानमाला, अध्यात्म-नाट्यरंग महोत्सव, मंदिरे व सार्वजनिक गणेशोत्सवाचे ऑनलाइन दर्शन तसेच घरगुती व सार्वजनिक गणेशोत्सवांसाठी स्पर्धांचे आयोजन होणार आहे.
राज्य महोत्सवासाठी लोगोचे अनावरण, गणेशोत्सवावर आधारित टपाल तिकीट व नाणे, देश-विदेशातील मराठी बांधवांपर्यंत सांस्कृतिक कार्यक्रम, पारंपरिक भजन व आरती सादर करणाऱ्या मंडळांना अनुदान तसेच राज्यस्तरीय भजन स्पर्धा यांचा समावेश असेल.

............