संजय राऊत काँग्रेसी विचारधारेकडे

संजय राऊत काँग्रेसी विचारधारेकडे
प्रवीण दरेकरांची टीका
मुंबई, ता. १५ : संजय राऊत हे बेधुंद, आंधळे झाले असून त्यांचे तोंड सुटल्याने ते वाटेल ते आरोप करीत आहेत. ते पूर्णपणे काँग्रेसची विचारधारा घेऊन वाटचाल करीत आहेत, अशी खोचक टीका विधान परिषदेतील भाजप गटनेते आमदार प्रवीण दरेकर यांनी खासदार संजय राऊत यांच्यावर केली.
दरेकर म्हणाले, की स्वदेशी ही देशासाठी एक चळवळ उभी राहिलेली आहे, परंतु काँग्रेसने ती पुढे नेली नाही. आज इतर देश आपल्यावर निर्बंध लादत असताना पंतप्रधान नरेंद्र मोदी यांनी स्वाभाविकपणे स्वदेशीचा नारा दिला. अशा वेळी भारत स्वयंपूर्ण झाला पाहिजे, स्वदेशीची मागणी वाढली पाहिजे, ही भूमिका पंतप्रधानांनी घेतली आहे. राऊत यांनी आमच्यावर लक्ष ठेवण्यापेक्षा जनतेच्या प्रश्नावर लक्ष ठेवावे. ते कधीही शेतकरी, कामगार, विकासाबाबत बोलत नाहीत.
शिवसेना (ठाकरे गट) व मनसे हे महापालिका निवडणुका एकत्रित लढण्याबाबत राऊत यांनी केलेल्या विधानावरही दरेकर यांनी टीका केली. उतावळा नवरा अन् गुडघ्याला बाशिंग अशी राऊत यांची अवस्था आहे. अजून कशातच काही नसताना ते हवेत गोळीबार करीत आहेत. घोडा मैदान लांब असतानाही राऊत यांना खुंटा बळकट करावा लागत आहे. २० वर्षांत ज्यांना राज ठाकरे व मनसे आठवली नाही त्यांच्यावर आता ही हतबलता आल्याचे दरेकर म्हणाले.